December 31, 2013

இன்றோடு முடிந்தது 2013 - வழியனுப்பு பதிவு - ட்விட்டடொயிங் - Twitter Log

இன்றோடு முடிந்தது 2013.

அப்பாடா என்றிருக்கிறது...

இன்று காலையில் இந்த வருடம் பற்றி எனது Facebook இல் சொன்னது "நூறு மீட்டர் என்று நினைத்து ஒரு மரதன் ஓடிய உணர்வு.
ஒரு ஆண்டு என்று சும்மா விட்டுவிட முடியாத சகலவிதமான ஏற்றமும் தாழ்வும் ஓட்டமும் ஓய்வும் நிறைந்த ஆண்டு... ​" போல இந்த வருடத்தின் ஆரம்பத்திலிருந்து நம்ப முடியாத மாற்றங்கள்...

சடுதியான மாற்றங்கள்.
சினிமாவில் மட்டுமே பார்த்திருக்கக் கூடிய மாதிரியான ​திடீர்த் திருப்பங்கள் நிறைந்த ஆண்டு.

நினைக்கவே முடியாத உயர்வுகளும், நினைத்தே இராத திடீர் மாற்றங்களும், இதுவரை கண்டிராத சில மனவேதனைகளும் ஒரு பக்கம்,
உடனடியாக முடிவு எடுக்கவேண்டிய தருணங்கள், ஏதாவதொன்றைத் திட்டமிட்டு சில மணித்துளிகளிலேயே அதை அப்படியே மாற்றிவிடவேண்டிய நேரங்கள், வாழ்க்கைப் பாடங்களை ஒரு கண மாற்றத்தில் கற்றுக்கொண்ட பொழுதுகள், அமைதியாக இருக்கவேண்டிய தருணங்கள்...

மறுபக்கம் எதிர்பாராத திடீர் மகிழ்ச்சிகள். காலாகாலத்துக்கும் மனதில் பொறித்துவைக்கக் கூடிய வாழ்க்கையின் முக்கிய கட்டங்கள் + சாதனைகள் + தடங்கள்...

பதவிகளில் பெரும் உயர்வு, பணம், பொருளாதாரம், வசதி + வாய்ப்புக்களில் சிக்கல் இல்லை.
கடன் ஏதுமின்றிக் கழிந்த ஆண்டு...
நானாகத் தேடிக்கொண்ட பகை என்று ஏதேனும் இல்லாத இன்னொரு ஆண்டு.
நீடித்த நல்ல நட்புக்களுக்கும், புதிய நல்ல நட்புக்களுக்கும் குறைவேயில்லை.
பாராட்டுக்களுக்கும் விருதுகளுக்கும் குறைவில்லை.
பயணங்களுக்கும் பயனுள்ள முயற்சிகளுக்கும் குறைவில்லை.
​இந்த 365 நாட்களில் கவலையுடன் அல்லது ஒரு வித நிச்சயமற்ற தன்மை கலந்த கலக்கத்துடன் கழிந்த நாட்களை விட சந்தோஷமாக இருந்த ​ மகிழ்ச்சியாக இருந்த நாட்கள் அதிகம்.
ஆனால் எண்ணிக்கையில் குறைந்தாலும் அந்தக் கரும் நாட்கள் தந்த ரணங்கள் + ரணங்களின் வடுக்கள் கொஞ்சம் அதிகமே...

இதனாலேயே 2013 என்ற ஆண்டு விரைவாக சென்று தேய்ந்திட வேண்டும் என்று மனமார விரும்பியிருந்தேன்.

13 என்ற  மேலைத்தேயத்தவர்களைப்போல எனக்கும் ராசியானதில்லை என்று அடிக்கடி நினைப்பதுண்டு. (மூட நம்பிக்கையே தான்)
2013 ஆண்டிலும் அது நிரூபணம்.

ஆனாலும் இந்த ஆண்டிலும் மகிழ்ச்சியோடு நான் பதிந்து வைக்க விரும்பும் சில நிகழ்வுகள் நடந்தேறின.

மகன் ஹர்ஷுவின் றோயல் கல்லூரி அனுமதி
தானாகத் தக்க நேரத்தில் தேடி வந்த சூரியன் வாய்ப்பு.
சூரியனின் அதியுயர் பதவியும் அங்கே கிடைத்துக்கொண்டுள்ள ஆதரவும் என்னால் + என் அணியினால் முடிந்தளவு கண்டுள்ள சூரியனின் முன்னேற்றமும்.
சூரியன் வானொலியுடன் சேர்ந்து முன்னெடுத்த பிரம்மாண்ட நிகழ்ச்சிகளின் வெற்றி
மன்னார் தமிழ்ச் சங்கம் வழங்கிய கௌரவ விருது 'அலைவழிச் சுடரோன்' + சந்தித்த ஆயர் பெருந்தகை
குடும்பத்துடன் சின்ன சின்ன சந்தோஷங்கள்..
அப்பாவின் தமிழ்ச் சங்க வெற்றி.

ஆனால் நிகழ்வுகளின் அடிப்படையில் மனத்தால் மிக நேசித்து மதித்த மாமனிதர் நெல்சன் மண்டேலாவின் மரணமும், மிக ரசித்த குரல்களில் ஒன்றுக்கு சொந்தக்காரரான P.B.ஸ்ரீனிவாசின் மரணமும் வெளிப்படை வெள்ளந்தி மனிதர்கள் கவி மார்க்கண்டேயர் வாலி, இயக்குனர் மணிவண்ணன் ஆகியோரின் மறைவுகளும் தனிப்பட்ட முறையில் பாதிப்பை ஏற்படுத்தின.

கிரிக்கெட்டை நேசிப்பவனாக சச்சின் டெண்டுல்கர், ஜக்ஸ் கலிஸ் ஆகியோரின் ஓய்வு பெரியளவு கவலை தராவிடினும் (தனிப்பட்ட முறையில் இவர்களின் ரசிகனில்லை) ஒரு வித வெறுமையையும் எனக்கு மட்டுமல்லாமல் நான் ரசித்துப் பார்த்த கிரிக்கெட்டுக்கும் வயது ஏறும் ஒருவித உணர்வை ஏற்படுத்தியுள்ளது.

நான் ரசித்த கிரிக்கெட்டின் நீண்ட பயணிகள் இவர்களது ஓய்வு 'தரமான' கிரிக்கெட்டுக்கு சற்று அயர்வைக் கொடுப்பது போலவே நான் ரசித்த மைக்கேல் ஹசி, ராகுல் டிராவிட் (IPL இல் இருந்து) ஆகியோரின் ஓய்வு மிக மனக்கவலை கொடுத்தது என்பது உண்மை.

வெறுமை... கவலை... ஆகியவற்றை கிரிக்கெட் பக்கம் கொஞ்சமாவது போக்கியது ஆஸ்திரேலியாவின் இம்முறை ஆஷஸ் தொடர் வெற்றி தான்.



2013 கற்றுத் தந்த பாடங்கள் பலப்பல...
வாழ்க்கை பற்றி, உண்மையான உறவுகள் + பாசம் + நேசம் + நட்பு பற்றி, மன்னிப்பின் மகத்துவம், மறக்காமல் இருக்கும் உண்மைத் தன்மை பற்றி...
உழைப்பு, நேர்மை, அர்ப்பணிப்பு, விடா முயற்சி இப்படி பல பல..



இந்த மறக்க முடியாத ஆண்டின் முக்கிய தருணங்களின் சில முக்கிய விடயங்களைப் பற்றிப் பார்க்க எனது ட்விட்டர் இடுகைகள் உதவுகின்றன.

ஓடிய காலத்தின் சுவடுகளாக...
இந்த வருடத்தின் இறுதி இடுகை, இறுதி நாளில்....

அதற்கு முதல் இந்த வருடத்தின் முதல் பாதியளவான ட்வீட்களை முன்பே தொகுத்து ட்விட்டடொயிங் - Twitter Log​ இடுகையாக்கியிருந்தேன்.


1 Sep 13

சாப்பிடாமல் கிடந்தாலும் சட்டப்படி வேலையை முடிக்கணும். #தொழில்தர்மம்
வேலை பூரண திருப்தி; இதனால் விருந்துண்ட மகிழ்ச்சி.
#பொற்காலப்புதன்
3 Sep 13

மீண்டும் கோகிலா- சின்னஞ்சிறு வயதில்..
மனதை அள்ளும் மெட்டும் ஒரு தடவை கேட்டால் நாள் முழுக்க மனதோடு ஆலாபிக்கும் ஷைலஜா + KJY வின் குரலும்
4 Sep 13

கனவென்னும் ஆலைக்குள் அகப்பட்ட கரும்பே..
நினைவென்னும் சோலைக்குள் பூத்திட்ட அரும்பே...
TRஇன் ஆரம்ப வரிகளே கட்டிவிடும்.
'எந்தன் பாடல்களில்'
4 Sep 13

விடுமுறையின் பின் பாடசாலை ஆரம்பிக்கிறது என்றவுடன் மகனின் கவலையை விட அம்மா தான் அவனை மிஸ் பண்ணப்போகிறேன் என்ற கவலையே பெரிதாயுள்ளது.
#Harshu
8 Sep 13

Clean shave ஆக இருப்பதிலும் மீசை வைத்திருக்கும்போதே சலூனில் VIP மரியாதை கிடைக்கிறது.
அடிக்கடி செதுக்கச் செல்லவேண்டி இருப்பதால்.
9 Sep 13

டீசர் பார்த்தாப் பிறகும் வைரமுத்து + A.R.ரஹ்மான் பாடல்களில் மட்டும் அசராத நம்பிக்கையுடன் காத்திருக்கிறேன். கேட்க மட்டும். #கோச்சடையான்
9 Sep 13

அந்தக் காலத்தில் இந்த மாதிரி Twitter, FB எல்லாம் இருந்திருந்தால் ராஜா,ரஜினி,ரஹ்மானுக்காக கோஷ்டி கட்டி கோதாவில் இறங்கி கும்மியடிப்பது போல பாரதிக்காகவும் பந்தி போட்டிருப்பார்கள்.
தமிழின் முதலாவது வெற்றிகரமான தனிநபர் brand - பாரதி.
11 Sep 13

தூக்குத்தண்டனை விதிக்கப்பட்ட அந்த நான்கு டெல்லி காமவெறி மிருகங்களோடு அவற்றுக்காக வாதாடிய வக்கீலையும் ஏன் தூக்கில் போடக்கூடாது?
13 Sep 13 

வீதியோர மணலில் முளைத்துள்ள சிறு புல்லிலும் அதற்கேற்ற அளவில், சிறிய அழகான வெள்ளைப் பூ.
எல்லோர்க்கும் வாழ்க்கை; அவரவர் அளவில், அவரவர் வழியில்
14 Sep 13

ஹர்ஷு "அப்பா #CLT20 இல் நீங்க வழமை போல தோற்கப்போற இலங்கை, Australia teamsக்குத் தானே சப்போர்ட்? நான் எப்பவும்போல சென்னை @ChennaiIPL " #அவ்வ்
16 Sep 13
 
உங்களில் எத்தனை பேருக்கு இந்தப்பாடல் பிடிக்கும்?
வைரமுத்துவின் வார்த்தை ஜாலம் புகுந்து விளையாடியிருக்கும்.
கூடவே SPBயின் குரல் மாயமும் கூட.

பாடலின் இடையே தமிழ் நாட்டின் அப்போதைய மதுவிலக்கை முத்தத்தோடு சேர்த்து ரசிக்க வைக்கிறார் கவிஞர்....

"முத்தம் போதாதே" - எனக்குள் ஒருவன் 
#பொற்காலப்புதன் 
#NowPlaying
Sooriyan FM
18 Sep 13

தேர்தல் காலம் வரும்போது தான் தெரிகிறது - நாட்டில் இத்தனை நல்லவர்கள் இத்தனை நல்ல விஷயங்களை எங்களுக்காக செய்திருக்கிரார்கள் என்று...
அதேபோல இத்தனை கொடியவர்கள் எங்கள் மத்தியில் வாழ்ந்துகொண்டிருக்கிறார்கள் என்று.

#ஹ்ம்ம் #பிரசாரம் #தேர்தல்
18 Sep 13


ஆரம்பம் பாடல்கள் - ஆகா ஓகோ, அட்டகாசம், அமர்க்களம் ஏன் பில்லா, மங்காத்தா என்று சொல்லும் அளவுக்கெல்லாம் இல்லை.வெகு சுமார். :/
என்னாச்சு யுவன்?
19 Sep 13


பிரியாணி, ஆரம்பம் என்று அடுத்தடுத்து யுவனிடமிருந்து ஏமாற்றங்கள். ஆரம்பமே, மேலால் மட்டும் ஓரளவு ok. #Arrambam  
பா.விஜய் வரிகளில் படு வறட்சி
19 Sep 13

அடிக்குப் பதிலடி புள்ளடி
நாளை #தேர்தல்
20 Sep 13

வேர் விட்டு வந்து இரு தசாப்தங்களுக்கு மேல் ஆகின்ற உறுத்தல் வாக்காளராக இல்லாமல் பார்வையாளராக இருக்கும் தேர்தல்களிலேயே  பெரிதாய்த் தெரிகிறது.
20 Sep 13


பத்தாயிரம் ரூபாய்க்கு சில சுஜாதாக்கள், சில இந்திரா சவுந்தரராஜன்கள், சில என்டமூரிக்கள், இன்னும் சில Archie, Jugheads, Tintins (பெரியவர் ஹர்ஷுவுக்காக) ஆங்கில எழுத்தாளர்கள், Strategy, marketing மற்றும் சமையல் நிபுணர்களை வீட்டுக்கு அழைத்து வந்துவிட்டோம்.

#புத்தகக்கண்காட்சி
International Book Fair Colombo
21 Sep 13


இன்னொரு முதல் எனக்கு.
தேர்தல் முடிவுகளை நேரடியாக Hiru Tvயில் வழங்கும் சந்தர்ப்பம்.
13 ஆண்டுகளின் பின் மீண்டும் தொலைக்காட்சியில் தேர்தல் கடமை.

ஆனால் வானொலி ஒலிபரப்பின் விறுவிறுப்பான கணங்களையும் வானொலியில் தேர்தல் முடிவுகளை அறிவிக்கும் அந்தத் தனிச் சுகத்தையும் இம்முறை தவறவிடுவதில் கவலை தான்.


#தேர்தல் #சூரியன் #election #HiruTv #SriLanka

21 Sep 13


பெருமகிழ்ச்சி, பெருமை, நன்றி, நம்பிக்கை +ஒற்றுமை 
#தேர்தல் #கடமை #எதிர்காலம் #பதில் 
ஒற்றுமையே உறுதியானதும் இறுதியுமானதுமான பலம்
22 Sep 13


ஆணை தெளிவானது.எம் அபிலாஷைகளும் நியாயமானவை.வென்றவர்கள் எம்மை உணர்ந்தவர்களே.
இனியும் அறிவுரை அளப்பறைகள்+ஐயங்கள் வேண்டாமே.
நம்பி,அவதானிப்போம்
22 Sep 13


United எல்லாத்துக்கும் இன்று ஆப்பு நாள் போல. Man United, மாமா united, யானை united எல்லாத்துக்குமே மரண அடி.
இனியும் பேசுவீங்களா ராசா?
#MUFC
22 Sep 13


P.சுசீலா அம்மையாரின் குரலில் இருக்கும் தாய்மைக்கும் தண்மைக்கும் வேறு பாடகிகளின் குரல் ஈடில்லை.

இன்று காலையில் ஒலிபரப்பிய நினைவுச் சின்னம் - ஏலே இளங்கிளியே பாடல் இன்னும் பல அதே மாதிரியான பாடல்களை மனதுக்குள் அசைபோட்டு காணத் தூண்டியுள்ளது.

இதேபோல இன்னொரு அரிதாக ஒலிக்கும் சுசீலா அம்மையாரின் பாடல் 
அம்மா திரைப்படத்தின் பூ முகம் சிவக்க
23 Sep 13


இந்த இரு நாணயங்களையும் ஞாபகமிருக்கிறதா?
அண்மையில் ஏற்பட்ட பணவீக்கத்தில் காணாமல் போனவற்றில் இவையும் அடங்கும்.

என்னதான் லட்சக்கணக்கில் சம்பாதித்தாலும், ஹர்ஷுவின் வீட்டுவேலைகளுக்காக இந்த 25 சத, 50 சத நாணயங்களைத் தேடப் பட்ட பாடு இருக்கே, நாய் படாப்பாடு.


சில வேட்பாளர்கள் வாக்குகளுக்காக அலைந்தது போல அங்கே, இங்கே அல்லாடி எ டுத்த இந்த நாணயங்கள் இப்போது என்னுடைய அரிய சேகரிப்புகளில் சேர்ந்துள்ளன.


சும்மாவா சொன்னாங்க நாட்டின் பொருளாதாரம் ஏறிப் போகுது என்று. — feeling meh.

September 24


மைத்துனன் Australiaவில் SPBயோடு படம் எடுத்துக்காட்டும்போது தான்,பக்கத்திலேயே நின்று எடுத்தும் இன்னும் கையில் கிடைக்காத படம் ஞாபகம் வருது :(
27 Sep 13


தியேட்டரில் பின் சீட்டில் இருப்பவரும் வரமாக வாய்க்கவேண்டும். குடிகாரப் புலம்பல் பேர்வழிகள் பின்னால் அமர்ந்தால் எவ்வளவு நல்ல படமாக இருந்தாலும் 3 மணிநேர நரகம் தான்.

(அதுக்காக ராஜா ராணி நல்ல படமானு கேட்காதீங்க. வெயிட் பிளீஸ், டீட்டெயிலா but நீட்டி முழக்காம சொல்றேன்)
28 Sep 13


தியேட்டரில் புகை பிடிப்பதற்குத் தடை விதித்தது போல, குடிபோதையில் வருவோரையும் திருப்பி அனுப்பும் சட்டம் வராதா?
- நாற்றம்+புலம்பலால் கடுப்பான அப்பாவிகள் சங்கம்
28 Sep 13


பாடசாலையில் பேச்சுப்போட்டிக்காக பழக்கிக் கொடுக்கும் நேரம், ஹர்ஷு "அப்பா இது ரேடியோ விளம்பரம் இல்லையப்பா. பேச்சு. விளங்குதா" என்கிறான்.
"ரெண்டும் தெரியும்டா.. சின்ன வயசுல நானும் பேச்சுப் போட்டியெல்லாம் வென்றிருக்கிறேன்" என்று சொல்ல,

"ஐயோ அப்பா, அது அப்போ தானே.. இப்ப advertisement தானே கூட செய்றீங்க. பேச்சு மாதிரி சொல்லித் தாங்க" - ஹர்ஷு.

கவனமாக இருக்கணும்.
அடுத்த வருஷம் எனக்கு அவன் சொல்லித் தரப்போறான்.
30 Sep 13


தமிழ் சினிமாவின் அமிதாப் பச்சன் என்று சத்யராஜை சொல்லலாமா? தனது வயதுக்கு ஏற்ற பாத்திரங்களில் ரசிக்கிற விதமாக ஜொலிக்கிறார் மனிதர்.
30 Sep 13



15 வருடங்கள்...

வரம் வாங்கி வந்திருக்கிறேன் போல...

ஓயாத ஓட்டம் (இரு சிறு ஓய்வுகள் இடையில் வரமாக)
ஓட்டப் பாதைகள் மாறினாலும், இலக்குகள் எட்டப்பட்டாலும் கூட 
இன்னும் ஓயாத உழைப்பு 
தேயாத நம்பிக்கை + தேடல் 
காயாத உற்சாகம் 
இன்னும் இருக்கு, இன்னும் சில,பல ஆண்டுகளுக்காவது இருக்கு.

இருக்கையை சூடாக்காமல், இருக்கும் வரை பேசப்படுவதாக, புதிதாக இன்னும் செய்ய ஆசை.


வயதேறினாலும் வார்த்தை தளம்பாத, வாக்குத் தவறாத, வழி திரும்பாத, வலி தெரியாத மனமும் நிலையும் வேண்டும்; உங்கள் ஆசிகள் + அன்போடு.


வழிகாட்டித் துணை தந்துகொண்டிருக்கும் அம்மா, அப்பா, மனைவி, தம்பிமார், என் ஹர்ஷு, அன்புக்குரியோர், நண்பர்கள், நேயர்கள், தொழில் தந்தவர்கள், சக ஊழியர்கள், அனுசரணையாளர்கள் முக்கியமாக அன்பு மாறாத நேயர்களுக்கு நெஞ்சார்ந்த நன்றிகள். 


ஒவ்வொரு ஆண்டும்போல இன்றும் நன்றியுடன் எழில் அண்ணாவுடன் பேசிக்கொண்டேன்.


"விசையுறு பந்தினைப்போல்-உள்ளம்வேண்டிய படிசெலும் உடல்கேட்டேன்,

நசையுறு மனங்கேட்டேன்-நித்தம்
நவமெனச் சுடர்தரும் உயிர்கேட்டேன்,
தசையினைத் தீசுடினும்
அசைவறு மதிகேட்டேன்" - பாரதி 

15 ஆண்டுகளின் ஓட்டத்தின் பூர்த்தி இன்னும் பூரணப்படாத இலக்குகளை முழுமையாகத் தேடும் பேராசையுடனும் உத்வேகத்துடனும் பயணிக்கும் உற்சாகத்தைத் தருகிறது.


#வானொலி #ஒலிபரப்புத்துறை #லோஷன் #15 #Loshan — feeling blessed at Sooriyan FM.

1 Oct 13


"பிலை" என்று சொன்ன கடைப்பையனை "தம்பி அது பிழை" என்று திருத்தினேன்.

"அதில என்ன பிலை அண்ணே? பிலைன்னு தானே சொன்னேன்? பிலை இல்லையே?" 
#அவ்வ்வ்
3 Oct 13


நடப்பது எல்லாமே ஏதோ ஒரு காரணத்துக்காகத் தான் என்பதை எப்போதுமே நம்புபவன் நான்.

சென்ற வருடத்தின் கடைசி மாதங்களில் + இந்த வருட ஆரம்பத்தில் 'ஓய்வாக' இருந்த போது போய்வந்த சில இடங்களுக்கு மீண்டும் ஒரு தடவை வரக்கூடியதாக இருக்குமா என்று அப்போதே மனம் சொன்னது.


வந்தாலும் அந்த இடங்கள் அவ்வவ்வாறே இருக்குமா என்றும் அன்றே நினைத்திருந்தேன்.


ம்ம்ம்...


யாழ்ப்பாணத்திலிருந்து வரும் வழியில் மனைவியின் திடீர் எண்ணத்தினால் சடுதியாக வாகனத்தை நான் திருப்பிச் சென்று கழித்த முல்லைத்தீவின் அந்த முழு நாளை மீண்டும் ஞாபகித்துக்கொள்கிறேன்.

4 Oct 13


"அப்பா, செத்துப்போனா திரும்பி வர ஏலாதா? கதைக்கவும் ஏலாதா?நாங்கள் விரும்பினாலும் திரும்பி வரேலாதா? ஏன்?" -ஹர்ஷுவின் கேள்வி.
பதில்கிறேன் நான்
5 Oct 13


அ முதல் இன்று வரை கல்வி முதல் வாழ்க்கை வரை கற்றுத் தந்த, தந்துகொண்டிருக்கும் அப்பா, அம்மா (என்னுடைய முதல் ஆசான்கள்) முதல் அத்தனை ஆசிரியர் தெய்வங்கள், வழிகாட்டிகள், துரோணர்கள், வாழ்வியல் எடுத்துக்காட்டு நாயகர்கள், ஏன் அனுபவப் பாடங்களைக் கற்றுத் தந்தவர்களையும் மனதார நன்றியுடன் ஞாபகப்படுத்திக்கொள்கிறேன்.

நீங்கள் வழங்கிய மொழியும் வழியும் தான் நான் இன்று நானாக இருக்கும் வரங்கள்.

6 Oct 13


பரிசாகப் பிள்ளையார்...
பிடிச்சது பிள்ளையார் தான் என்று இன்னமும் நம்பிக்கை இருக்கிறது.
அவசரமாக அனர்த்தம் தேடாமல், ஆறுதலாக எண்ணியது அடைவோம்.
7 Oct 13

மகாபாரதம், ராமாயணம் இரண்டிலுமே வாரிசுப் பட்டங்களின் வரிசை மாற்ற வரம் தான் குழப்பங்கள்+குரோதங்களின் ஆரம்பம்.
சத்யவதி, காந்தாரி & கைகேயி
7 Oct 13


என் ஜீவன் பாடுது படப்பாடல் 'கட்டி வச்சுக்கோ' பாடலை அப்படியே எடுத்துப் புதுசாக்கியிருக்கிறார் தமன் 'ஆல் இன் ஆல் அழகுராஜா' - யாருக்கும் சொல்லாமல் பாடலில். 
#அடிங்கடா #Copy
8 Oct 13


சிறு வயதிலேயே மனதில் இடம்பிடித்த இரு மகாபாரதப் பாத்திரங்கள் - பீஷ்மர் & அபிமன்யு. வீரமும் விரதமும் தியாகமும் துணிவும்.
ஒப்பிலா இருவர்
8 Oct 13

எனக்கென்னவோ மகாபாரதம் நூலாக வாசித்த காலத்தில் பார்த்த தூர்தர்ஷனின் மகாபாரத பீஷ்மரைத் தான் இப்போதும் பீஷ்மராக உருவகிக்க முடிகின்றது.
8 Oct 13

கடவுளின் துகளால் கிடைத்த நோபெல் பரிசுக்காக இருவரும் கடவுளுக்கு நன்றி சொல்லி இருப்பார்களா? 

Sooriya Raagangal

கடவுளின் துகள் பற்றி ஆராய்ந்து அறிமுகம் செய்த விஞ்ஞானிகள் 
François Englert of Université Libre de Bruxelles, Brussels, Belgien, and Peter W. Higgs of the University of Edinburgh, UK ஆகியோருக்கு பௌதிகத்துக்கான இவ்வருட நோபெல் பரிசு அறிவிக்கப்பட்டுள்ளது.

http://mashable.com/2013/10/08/nobel-prize-physics-higgs-boson/

8 Oct 13


கமலுக்கு K.J.Y பாடிய பாடல்களில் best கண்ணே கலைமானே என்றால்,அடுத்ததாக இந்தப் பாடல் என்பேன்..
பூ மலர்ந்திட - டிக் டிக் டிக் 
#nowplaying
9 Oct 13


இதஆ பாலகுமாரா- 2 1/2 மணிநேரம் மொடாக்குடி குடிச்சிட்டு, பின் குடிக்காதீங்கடா என்று பம்மாத்த வி.சேதுபதி & கார்க்கியை வீணாக்கியுள்ளனர் #IAB
9 Oct 13


கால் நூற்றாண்டாக தினமும் கிரிக்கெட்டே வாழ்க்கை என்று வாழ்ந்த சச்சினுக்கு இனி வாழ்க்கை ஒருவேளை போரடிக்குமோ? #SachinRetires 
Think abt him too
10 Oct 13


குழந்தைகள் குழு நடனத்தைத் தங்கள் இஷ்டப்படி தவறாக ஆடுவதும் ரசனையான அழகு தான்.
#நவராத்திரி பாடசாலை கலைமகள்_விழா ஒத்திகையில் ஹர்ஷு & நண்பர்கள்
12 Oct 13


நினைவு தெரிந்து என் முதலாவது மேடையும் ஒரு #நவராத்திரி மேடை தான். ஆறு வயதில் நவராத்திரி பற்றி வேட்டியுடன் பேசியது ஞாபகம் வருகிறது.
13 Oct 13


கண்டிப்பான கன்றாவித்தனமோ கஞ்சத்தனமோ 'ரஜினி' புகழ்பாடும் லுங்கி டான்சிலும் கூட ரஜினி பக்கம் ஜெயா TV camera திரும்பவில்லை.
#சினிமா100
14 Oct 13


கமலின் மொழிச்செழுமையும் ரஜினியின் styleஉம் தமிழ் சினிமாவின் மாறா இளமை அடையாளங்கள்.
பார்க்கும் சினிமா 100 விழாவின் எரிச்சலிலும் சிறு இனிமை
14 Oct 13


அருண்மொழியின் பாடல்கள் எந்தவொரு நாளின் என் நிகழ்ச்சியையும் மேலும் பல மடங்கு பொலிவுபடுத்தி விடுகின்றன. இன்று 3 பாடல்கள் :)சொல்லவா வேண்டும் :)
16 Oct 13


நகர்ப்புற இயந்திரத்தனம் விட்டு யாருக்கும் தெரியாத, யாரும் எம்மை அறியாத பசுமையான கிராமங்கள் தேடித் தொலையும் வார இறுதி... escape from boring & robotic #city #life
18 Oct 13

மழையின் ஈரமும் மயங்கும் மாலை நேரமும்... நீண்ட பயணம் எதுவும் ரசனையான இயற்கை இருந்தால் அலுப்பதில்லை. Another #amazing #nature #scenery on my long #weekend #srilanka
20 Oct 13



யோவ் ஹாரீஸு.. 
இன்னும் இரண்டாம் உலகம் படமே வரல. அதுக்குள்ள 'விண்ணைத்தாண்டி' பாடலின் மெட்டு, இசையை மாற்றாமல் என்றென்றும் புன்னகையில் பாடலா? 
என்னா எங்கள் ஞாபக சக்திக்கு டெஸ்ட்டா?
அடுத்த முறை கொஞ்சம் gap விட்டு copy பண்ணுங்க மாஸ்டர்.

just played Ele ele from Endrendrum Punnagai and mixed it with Vinnai thaandi 

Facebook.com/SooriyaRaagangal
24 Oct 13


அடடா.. பைசாவும் நம் நாட்டு நாணய அலகாகி விட்டதோ?
தற்செயலாக எதையோ கேட்டுத் தொலைச்சிட்டேன்.
அதேபோல் இன்று குரல் பரிசோதனைக்கு யாழில் இருந்து வந்த பெண் 'பசங்க' 'கால் பண்ணுங்க'என்கிறார்.

வடிவேலுவின் வசனங்கள், மொக்கை, இன்னும் சில அன்றாட கடிச் சொற்களோடு நின்றுவிடும் என்று பார்த்தால்,
'ஜனகணமண' பாடித்தான் ஓய்வோம் போலல்லவா இருக்கு நிலைமை. — feeling tired.
25 Oct 13

அம்மாவுக்குப் பிறந்த நாள்...

என் இந்த வாழ்க்கை, பயணிக்கும் ஒலிபரப்புப் பாதை, என் மகிழ்ச்சியான தருணங்களின் அடிப்படையின் ஆதாரம் என் அம்மா.

நீங்கள் எனக்கு வரங்களாகக் கொடுத்த அத்தனையும் தான் எனக்கு வாழ்க்கையாக, விருதுகளாக, பெருமையாக, பெயர் கொடுத்து நிற்கின்றன.
பதிலுக்கு நான் உங்களுக்கு கொடுத்தது பத்து வீத மகிழ்ச்சியாவது இருக்குமா தெரியாது.

ஆனால், வாழ்த்துக்கள் + வார்த்தைகள் தாண்டிய, வாழ்க்கையை விட அகன்ற அன்பும் நன்றியும் உங்கள்
மகனாக வாழ்ந்து காட்டும் உறுதியும் மனதில்..

இப்போது என் அம்மா என்பதைத் தாண்டி, லவ்சுகிக்கு இன்னொரு அம்மாவாக, ஹர்ஷுவின் வழிகாட்டும் நண்பியாக உங்கள் அர்ப்பணிப்பும் பங்களிப்பும் எங்கள் வாழ்க்கையுடன் பயணிக்கிறீர்கள்.


இனிய வாழ்த்துக்கள் அம்மா.
26 Oct 13


சீட்டில் நித்திரையும் சீட் பெல்ட் போடாததும் திறக்கப்பட்ட இரண்டையும் அவற்றின் வரலாற்றுச் சிறப்பையும் தாண்டிப் பேசப்படுகின்றன.
#இலங்கை #ஹ்ம்ம்
27 Oct 13


உதெல்லாம் தெரிஞ்சு தான் அமெரிக்கன் அப்பவே பொதுநலவாயத்தில் சேராமலே விட்டான்.
28 Oct 13


தமிழில் தாதா, அடியாள் திரைப்படங்களை நேர்த்தியாகவும் மிகையின்றியும் முதலில் எடுத்தவர் மணிரத்னம் தான்.
நாயகன், தளபதிக்கு முன்னரே பகல்நிலவு
28 Oct 13


Happy birthday Harshu ♥ எங்கள் வாழ்க்கையின் மகிழ்ச்சியின் முழுமை இன்று ஆறு வருடங்களின் அழகுப் பூர்த்தியில் அவன் மகிழ்ச்சியும் வளர்ச்சியும் எங்கள் வாழ்க்கை. என் உயிரின் இன்னொரு வடிவத்துக்கு வாழ்த்துக்கள் :) #Harshu
1 Nov 13

15 celcius குளிருடன் சில்லென்று வரவேற்றிருக்கிறது நுவரெலியா :)
எஸ்கிமோவாகிய ஹர்ஷுவும் இந்த இரவிலும் குளிரிலும் உலாப்போக விரும்பும் நானும் ;)
1 Nov 13


இனிய தீபாவளி வாழ்த்துக்கள்...
கொண்டாடும் அனைத்து அன்புள்ளங்களுக்கும்.

பண்டிகைகள் கொண்டாடாவிட்டாலும் கொண்டாடும் அன்புள்ளவர்களின் மகிழ்ச்சியில் பங்கெடுக்கும் இனிய தருணங்கள் எப்போதும் வாய்க்கின்றன.

இம்முறை விசேடங்கள் ஏராளம்...

நுவரெலியாவின் இயற்கை குளிர் சிலிர்ப்பிலும், சூரியன் மெகா  பிளாஸ்ட் கோலாகலத் திருவிழாவிலும், குடும்பத்தோடும் நண்பர்களோடும் அன்பை அபரிதமாக வெளிப்படுத்தும் நேயர்களோடும் (ஐந்து நீண்ட வருடங்களின் பின்னர்) வித்தியாசமாக கொஞ்சம் பரபரப்பாக, கொஞ்சம் விடுமுறை  உணர்வோடு...

மனதில் நிம்மதியோடும் மற்றவரை மகிழ்ச்சிப்படுத்தியும் கொண்டாடுங்கள்.
November 2 via mobile




Kohliக்கு இன்று பிறந்த நாளாம். அடப்பாவி நீயும் number 5? நம்ப முடியலையே ராஜா. ஆனாலும் என் இலக்கத்தில் பிறந்ததனால் நீயும் என் தோழனே ;)
5 Nov 13


ஆண்டாண்டு காலமாக ஆங்காங்கே இருந்த வீடுகள் திடீரென அத்துமீறிய கட்டடங்களாக இடித்துப் போடப்படுகையில் அப்பாவிகளின் கனவுகளும் நசுங்கிப்போகின்றன
5 Nov 13


ஒரு கலை வரலாறு இன்று 59 வயதைக் கொண்டாடுகிறது.
நான் என்றும் ரசிக்கும் கமலுக்கு இனிய வாழ்த்துக்கள்.
7 Nov 13


Facebookஐ மிக இலகுவாக, விரும்பிய மாதிரி முகப் புத்தகம், மூஞ்சிப் புத்தகம், முக ஏடு இப்பிடியெல்லாம் மொழி பெயர்த்த (!) மக்கள்ஸ் YouTubeஐ ஏன் நீ குழாய் அல்லது நீங்கள் குழாய் என்று இன்னும் பயன்படுத்த முயலவில்லை?

#முடியல #படுத்துறாங்க
8 Nov 13


கடன் வாங்கிக் கல்யாணம் ஒன்றை செய்தாலும் யாருக்கோ புண்ணியம் கிட்டும்.
இது யாரையும் கரையேற்றவுமில்லை; கால் பங்கு புண்ணியமில்லை.
எல்லாப் பக்கமும் எல்லோரிடமும் திட்டு; எக்கச்சக்க லட்சம்,கோடி கடன்;
எல்லா இடமும் கண்டபடி தோண்டி, கண்டதைக் கண்ட இடங்களில் நட்டு, எல்லாத்தையும் எந்த நேரத்திலும் மூடி,மூட்டை கட்டி, சும்மா ஒரு ஸ்டேட்டசுக்காக, சிலதை மூடி மறைக்க, ஒரு அநாவசிய அலங்காரக் கூத்து.

ஹ்ம்ம்...

எல்லாம் முடிந்த பிறகு எங்கள் தலையில் வரி கள் என்று எல்லாத்தையும் கட்டாமல் இருந்தால் நாமும் சேர்ந்து வாழ்த்தி எல்லாத்தையும் பொறுத்து பார்த்து ரசிப்போம்.
9 Nov 13



பண்ணையாருக்குப் பதிலா கைத்தடியை அனுப்பும் வழக்கம் காலாகாலமா இருக்குத் தானே?
ஆமாஞ்சாமி போட்டு,அனுமதியை வேறிடத்தில் கேட்பதானால் இரண்டும் ஒன்றே
11 Nov 13


"மீன் இனி சமைக்காதீங்கோ அம்மா. தொட்டியிலுள்ள மீன்கள் பயந்திடும்" மீன் தொட்டி மீன்களின் மொழி திடீரெனப் புரிந்தவனாக ஹர்ஷு.
11 Nov 13


என் போன்ற பலரின் ஆரம்ப வாசிப்புக்களில் இவரும் இப்போது இல்லை 
அஞ்சலிகள் புஷ்பா தங்கத்துரை.
11 Nov 13

சாண்டில்யனின் 'கடல்புறா'வை அறியாதோர் யாரும் கிடையாது.

'கடல்புறா' திரைப்படம்,பாடல்கள்?
எத்தனை பேருக்குத் தெரியும்? அல்லது ஞாபகம் இருக்கு?

SPB பாடிய ரசனையான பாடல் ஒன்று கேட்டால் நாள் முழுக்க மனதோடு.
நான் ரசித்த அந்தப் பாடலை உங்களோடும் பகிர்ந்து கொள்கிறேன், இன்னும் சில நிமிடங்களில்...
அடுத்த பாடல்.
13 Nov 13


சச்சின் என்ற சிங்கம் அவரது சாதனைகளுக்காகவும், அவரது நீண்ட கால நிலைப்புக்கும்,கடின உழைப்புக்கும், கிசுகிசுக்களில் சிக்காத தனி மனித ஒழுக்கத்துக்கும் நிச்சயம் போற்றிப் புகழப்பட வேண்டியவரே...

எங்கள் தலைமுறையின் மிகச் சிறந்த துடுப்பாட்ட வீரர் என்ற மகுடம் இவரைத் தாண்டி இன்னொருவருக்கு செல்ல முடியாது என்பதும், இவரைக் கிரிக்கெட்டின் கடவுள் என்று அழைப்பதையும் யாரும் மறுக்க முடியாது.

ஆனால் ஓய்வு பெறும் ஒரு மேதையைப் புகழ்ந்து விடைகொடுக்கவேண்டும் என்பதற்காக சச்சினிடம் இல்லாத விடயங்களையும் இருப்பதாக பொய்யுரைப்பது உறுத்துகிறது.

1.சச்சின் நடுவரின் தீர்ப்புக்காகக் காத்திருப்பவரில்லை என்பது.
Sachin is a 'Walker' - Most of you will accept Sachin was never a walker. He has waited so many times for umpire's decisions.

2. சச்சின் எந்த சந்தர்ப்பத்திலும் எதிரணி வீரர்களுடன் மோதியவரோ அவர்களை அவதூறு பேசியவரோ இல்லை என்பது.
பழைய போட்டிகளை ஞாபகப்படுத்திப்பாருங்கள். அல்லது பழைய இந்தியப் போட்டிகளின் காணொளிகளைப் பாருங்கள்.

பக்தர்களாக 'மெய்'மறக்காமல் ரசிகராக இருப்போம்;

சச்சினுக்கு அவர் அளித்த சந்தோஷ, தருணங்களுக்கு நன்றி தெரிவித்து, சாதனைகளுக்கு கௌரவம் கொடுத்து விடைகொடுப்போம்.
Let's enjoy Sachin's last 5 days in International cricket. These days will never come back.

#ThankYouSachin #Sachin

http://www.arvloshan.com/2009/11/20.html

http://www.arvloshan.com/2009/03/blog-post_09.html
14 Nov 13


ஆத்திரக்காரனுக்குப் புத்தி மட்டு. அவசரக்காரனுக்கு சர்வதேசக் குட்டு.
தடுக்கவும் மறிக்கவும் துணிச்சல் மட்டுமன்றி ராசதந்திரமும் வேணும்
14 Nov 13


வருக இளவரசே.. உங்கள் தாத்தாவுக்கு நாம் கப்பம் கொடுத்தது அந்தக் காலம். இப்போ நம்ம ராஜ ஆட்சி. கண்டு களியுங்கள்.
இது இலங்கையின் நேரம் ;)
14 Nov 13


ஐந்து வருடங்களுக்கு முன்பு, இதே நவம்பர் 14, இதே நேரம்... 
இலங்கை தமிழ் ஊடகவியலாளன் என்பதற்கான அடையாளம் 
#life #SL
14 Nov 13


ம்ம்ம்... இன்னொரு ரட்சகர்? இதுவரை இல்லாத புது இடத்திலிருந்து.
என்ன பலன் இனி உண்டு என்பதைத் தாண்டி, அக்கறை + துணிச்சலுக்கு நன்றிகள் டேவிட்
15 Nov 13


சில காலம் குறைந்திருந்த #Sachin விளம்பரங்கள் மீண்டும் தொலைக்காட்சிகளை நிரப்பும்.
 #ThankYouSachin
16 Nov 13


மிகப் பிடித்த வீரராக எல்லோருக்கும் இல்லாவிடினும் வெறுக்கப்பட முடியாதவர்.
Always excited to see @sachin_rt as bowler. 
#ThankYouSachin @BCCI
16 Nov 13


சர்வதேச ஆண்கள் தினம் இன்றைக்கு.
சரி,சந்தோசமாக் கொண்டாடினாப் போச்சு. அண்ணாமார்,தம்பிமார்,அங்கிள்மார் எல்லாருக்கும் வாழ்த்துக்கள்.
#Men'sDay
19 Nov 13


Australiaவிலிருந்து என்ன வேணும் என்று கேட்ட மைத்துனரிடம் செல்லப் பிராணியாக வீட்டில் வளர்க்க கங்காரு வாங்கி அனுப்பக் கேட்டேன்.
பதிலில்லை ;)
19 Nov 13


வாசிக்கப்படாத நல்ல நூல்,கேட்கப்படாத நல்ல பாடல்,எழுதப்படாத நற்சிந்தனை,சொல்லப்படாத தேவையான அறிவுரை..
இவற்றுள் எது பெரிய இழப்பு?
#இரவு_டவுட்டு
20 Nov 13


cricket பற்றி நினைத்தாலே இப்போதெல்லாம் அந்த முழியும் மொழி,இனம் மறந்த உளறலும்  ஞாபகம் வருவதால் கடுப்பாகிவிடுகிறது.
மு எனும் மூ :/
20 Nov 13


"இப்ப கடவுளை யாரும் கும்பிடாத காரணம் தெரியுமா அப்பா?"- ஹர்ஷு.
"ஏன்?"
"அவர் தான் பிழை விடுற யாரையும் இப்ப  தண்டிக்கிறதில்லையே"
ம்ம்ம்...
20 Nov 13


பட்ஜெட் இப்ப அள்ளி அள்ளித் தான் கொடுக்கிறது. அள்ளி வச்சு ஆப்படிக்கிற லிஸ்ட் இனித்தான் வாசிப்பார்.
I am waiting.
21 Nov 13


கிரிக்கெட் பார்க்கும் என் மகன் இன்னும் சில வருடங்களில் என்னை அரசியல்வாதியாக அவதாரம் எடுக்குமாறு கேட்பானோ?
#அவ்வ்வ்
21 Nov 13


நேற்று, என்னண்ணே உங்கட ஆஸ்திரேலியா இந்த முறையும் அடிவாங்கும் போல கிடக்கே என்று சொன்ன அலுவலக தம்பிக்கு சொன்னேன், 
"தம்பி, நம்ம ஆஸ்திரேலியா பழைய தமிழ்ப்பட ஹீரோக்கள் மாதிரி, முதல் நாள் நாலஞ்சு அடி வாங்கி, மண்ணில விழுந்து,பிறகு எழும்பி, கடைவாயில் வழியுற ரத்தத்தைத் துடைச்சிட்டுத் தான் அடிப்பாங்க"

பார்த்தீங்கல்ல... 
#Ashes #Cricket
22 Nov 13


வெள்ளவத்தை பிரதான வீதியின் இரு பக்கமும் தோண்டி நடுவிலும் உடைக்கிறாங்களே... ஒருவேளை அகழி வெட்டி அரண் போடப்போறாங்களோ?
I am waiting :p
23 Nov 13


பேசுவனவற்றைப் பேச முடியாத் தருணங்களில் வேறேதேனும் பேசாமல் மனதில் நினைந்து இரு நாள் மௌனம் சுமப்பது அர்த்தமுள்ளது.
அர்ப்பணம் - சமர்ப்பணம்.
28 Nov 13


Make it simple #ஆரம்பம் 
உண்மையில் ஒரு மகா வாக்கியம்.
Albert Einstein "Make everything as simple as possible, but not simpler"
#life
28 Nov 13


ஒவ்வொருபடியாக மேல் நோக்கி முன்னேறுங்கள்...
கடினமாக இருக்கலாம், ஆனால் மேலிருந்து பார்க்கையில் அழகாக இருக்கும்!
29 Nov 13


Colombo mini cyclone with heavy rain. #srilanka சில்லென்ற மழை வேகமாக சுழன்றடிக்கும் காற்றோடு. சாம்பல் நிறமாகிப்போன வானமும் சாலையெங்கும் நீர் ஆறாக ஓடும் கோலமும்.
30 Nov 13

என்னதான் ஆற்றல் உள்ளவனாக இருந்தாலும் செலுத்துபவன் கையில் தான் இறுதி வெற்றியின் உறுதி தங்கியுள்ளது.
மகாபாரதம் சொல்வது.
அர்ஜுனன் சாரதி கண்ணன்.
3 Dec 13




"வா வா கன்னித்தேனே" ரசனையான பாடல். ஆனால் மன்சூர் அலிகானின் சிந்துபாத் படத்தில் இடம்பெற்றதால் பெரிதாகப் பேசப்படாமலே போய்விட்டது.
Now playing
4 Dec 13


வஞ்சம் இல்லா மனது நிம்மதியான தூக்கத்துக்கான விழிகள் கொண்டது.
மனம் போல வாழ்வு :)
5 Dec 13

பதவி + ஊதிய உயர்வு பெற்ற சகோதர,சகோதரியர்க்கு வாழ்த்துக்கள்.
உங்கள் உழைப்பில் மட்டுமன்றி உயர்விலும் உண்மை உவகை கொள்கிறேன்.
#office #team
6 Dec 13


முதல்வன் KTVயில்.
இன்னொரு தடவை இன்னும் புதுசாக.
சுஜாதா, ஷங்கர், ரஹ்மான் & ஒளிப்பதிவாளர் K.V.ஆனந்த். ஆற்றலுடைய இணைப்பு; அழுத்தமான படைப்பு
7 Dec 13


எத்தனை ஆயிரம் விதமான சாப்பாட்டு இணைப்பு இருந்தாலும், தேங்காய்ப்பூ பிட்டு + கத்தரிக்காய்க் குழம்புக்கு இணையாக எதுவும் கிட்ட வராது.
#நா'நயம்'
8 Dec 13


நன்மை,தீமை, குறுங்கால, நீண்ட கால, பின், பக்க,முன் விளைவுகள் எல்லாம் தாண்டி,
இந்தியாவின் நான்கு வட மாநிலங்களிலும் ஆளும் கட்சி #Congress வாங்கிய மரண அடியில் ஏதோ ஒரு திருப்தி.
(ஆராய்பவர்கள் ஆராயட்டும்; ஆதங்கமோ ஆனந்தமோ படுபவர்கள் அதை அதைப் படட்டும்)
8 Dec 13


பகலின் வேலை அசதியும் களைப்பும் ஹர்ஷுவுடன் பேசிய 'பெரிய' விஷயங்களால் முற்றாகவே நீங்கிப் புதிதாய் ஒரு புத்துணர்வு.

பாரதியின் கவிதைகளை மனைவியிடம் நயந்து கொண்டிருக்கும்போது, பாரதியின் வரலாற்றைக் கேட்ட அவனுக்கு மகிழ்வாக சொல்லிக்கொடுத்தேன்.

தமிழ்ச்சங்கத்தில் மீசையுடன் பார்த்த சிலையை ஞாபகப்படுத்தியவன், பாப்பா பாடலை மட்டுமல்லாமல், புதிய ஆத்திசூடியையும் எழுதியவர் இவர் என்கிறான்.

இதையெல்லாம் தூக்கிப் போடும்படி, கப்பல் ஓட்டிய தமிழன் பாடல் 'காற்றுவெளியிடைக் கண்ணம்மா'வை நாம் ரசிக்க அவன் சகிக்கிறான்.

வறுமையின் நிறம் சிகப்பு படத்தில் வந்த பாரதியின் 'நல்லதோர் வீணை செய்தே' பாடலை யூடியூப்பில் நான் ரசிக்க, அர்த்தம் கேட்டுத் தெரிந்துகொள்கிறான்.

அதிலும்,
'சொல்லடி சிவசக்தி என்னை
சுடர்மிகு அறிவுடன் படைத்து விட்டாய்
வல்லமை தாராயோ இந்த மாநிலம்
பயனுற வாழ்வதற்கே'

இவை இந்தச் சிறு வயதில் அவனுக்கு என்ன புரிகிறதோ, சொல்லிக் கொடுக்கையில் புல்லரித்தது; பாரதியை சிறு வயது முதல் ரசித்த பெருமை மனதெல்லாம் நிறைந்தது.
10 Dec 13


நீங்கல்லாம் தினமும் இளையராசா பற்றியும் ரஹ்மான் பற்றியும், தல பற்றியும் தளபதி பற்றியும் போற்றி ஏற்றும்போதும், பொங்கிவெடிக்கும்போதும் மற்றவங்க எல்லாம் பொறுத்துக்கொண்டே இருக்கலையா?

அவங்களுக்கே அப்படியென்றால், சின்ன வயது முதலே ரசித்த, தமிழால் வியந்த பாரதி பற்றி ஒரே ஒரு நாள், அதிலும் விரல் விட்டு எண்ணக் கூடிய சிலர் மட்டுமே தங்களுக்கு (கொஞ்சமா)
தெரிந்த பாரதி கவிதைகளை / பாடல்களை சொல்லிட்டு போகட்டுமே...

நாளைக்கு நாள் முழுக்க நீங்கள் உங்கள் time lineஐ மூடி வைக்கவா போறீங்க ?

மண்டேலாவுக்கு பின் பாரதியா என்று 'பெரீய' அலப்பறை காட்டும் அல்டாப்பு
ஆசாமிகளுக்கு மட்டும்.
Cool
11 Dec 13


இரு நாள் இரவு ஓட்டத்தின் முடிவில், வீதியில் குவித்த மண்ணும் வீதியோரக் குப்பையும் மட்டுமே எஞ்சி.. 
எங்கள் வரியெல்லாம் புகை+மண்+குப்பையாக
16 Dec 13


மீன்களின் பசி பாஷைக்கும் அவற்றின் வாலாட்டலுக்கும் கூட அழகான அசைவு, நேரத் தொடர்பு இருக்கிறது.
16 Dec 13


வாழ்க்கையில் எடுத்த முடிவுகளை நினைத்து எப்போதுமே மனவருத்தப்பட்டதில்லை; ஆனால் முன்பு தீர்க்கமான தருணங்களில் எடுத்த சில முக்கிய முடிவுகளை இப்போது நினைத்துத் திருப்தியும் பெருமையும் அடைகிறேன்.

அதே பழைய லோஷன் வாக்கு எங்கேயோ இருந்து கேட்குது "அப்போதே சொன்னமில்ல " — feeling proud.
17 Dec 13


இரண்டாம் உலகம் பார்க்க ஆசைப்பட்டுப் போய், இவன் வேற மாதிரி பார்த்துத் திருப்திப்பட்ட மாலை.
இனி செல்வராகவன் படைப்புப் பற்றி DVD சொல்லித் தான் தெரிந்து கொள்ளவேண்டும்.
எங்கேயும் எப்போதும் சரவணன் மீண்டும் ஜெயித்துள்ளார்.
ஹட் ட்ரிக்குக்கு முற்கூட்டிய வாழ்த்துக்கள்.
18 Dec 13


ஐயகோ,இத்தனை தமிழ்க் கீச்சர்களும் ட்விட்டர்களும் மாங்கு மாங்கென்று நாள் முழுதும் மாய்ந்தும் முதல் 10 Tweet மொழியில் தமிழ் இல்லையா?
@mashable
19 Dec 13 


ஜில்லாவில் இளைய தளபதி சோடாக்கடை/ ஜூஸ் கடை/ ஐஸ்கிரீம் கடை ஓனரா நடிக்கிறாரோ? - கஞ்சிபாய் #டவுட்டு 
 'ஜில்'லா ? ;) 
#Jilla #Vijay #ஜில்லா
19 Dec 13


ரத,கஜ, துரக பதாதிகள் எதிர்ப்பினும்
அதகளம் புரிந்திடும் வீரம்...
இவன் மதபுஜம் இரண்டும் மலையென எழுந்திட
செதுகளம் சிதறிடும் வீரம்.
- சகமனிதன் ஒரு துயர் எனக் கசிந்ததும்
அகம் பதறி எழும் வீரம்.
- #வீரம்
வாய்ப்பு வழங்கப்படும்போதெல்லாம் வளமான வார்த்தைகளில் தரமான அர்த்தம் பொதிந்த அம்பு தொடுத்து இலக்கடிக்கும் விவேகா வீரத்தில் விளையாடியிருக்கிறார்.
20 Dec 13



இப்போதே குறித்துக்கொள்ளுங்கள்...
2014 பிறக்கும் நேரத்தில் இனி அனைவரது வாய்களும் முணுமுணுக்கும் ஒரு பாடலாக,
ஜில்லா படத்தின் கண்டாங்கி கண்டாங்கி...

நான் முன்பிருந்தே ரசிக்கும் ஒரு பாடகர் விஜய் மீண்டும் அசத்தியிருக்கிறார். (தொடர்ந்து விஜய் பாடவேண்டும்)
ரசனையான கூட்டு.
எப்பவோ கேட்ட மெட்டு, ஆனாலும் குறும்பு வரிகளும், ஸ்ரேயா கோஷலின் குயில்க் குரலும், இமானின் இனிய இசைக் கோர்ப்பும்...
இவை தாண்டி விஜய் ஜெயித்துள்ளார்; ஈர்த்துள்ளார்.

#jilla #ஜில்லா
20 Dec 13



நான் படித்த பாடசாலையின் பெறுபேறுகள் எப்படி என்பதுடன், மகன் கற்கும் பாடசாலையின் பெறுபேறுகள் எப்படி என்று அறியும் காலம்.
காலம் ஓடுது.
21 Dec 13


நத்தார் என்றவுடன் எனக்கு ஞாபகம் வரும் எங்கள் இன்னொரு அம்மா, சிறு வயதில் எங்களைப் பொறுத்து வளர்த்த அம்மம்மாவின் பிறந்த நாள். 
#நினைவுகள்
25 Dec 13


ஊழ்வினை உறுத்தி, உள்ளெல்லாம் கிழிந்து, முகமூடிகள் உரிந்து... மனதில் முள்முடியுடன் பழைய சிலுவை.
பாவத்தில் பழசு புதுசு இல்லை.
26 Dec 13


எத்துணை உயரம் வளர்ந்தாலும் மண்டைக்கனம் சற்றும் ஏறாத ஒருவராகத் தெரிகிறார் இசைப்புயல் @arrahman 
இப்படி இருக்க எப்படி இந்த ஞானியால் முடிகிறது?
27 Dec 13


ஐயய்யோ.. ராசாவின் பேச்சுக்கள், அண்மைய பாடல்கள் பற்றி உள்ளதைச் சொன்னால் மட்டுமில்லை,ரஹ்மான் பற்றி உள்ளதை, நல்லதைச் சொன்னாலும் எரியிறாங்களே..
28 Dec 13


ஆர்மோனியப் பொட்டி வச்சு இசையமைச்சாத் தான் இசையமைப்பாளராம்;
இன்னும் ரஹ்மானின் கம்பியூட்டருக்குள்ள இருந்து அவர் இசையை டவுன்லோட் தான் பண்ணுறார் எண்டு நினைக்குதுகளோ இந்த ஞான(ஞானி??)சூனியங்கள் ?

அட அடம்பிடிச்ச அதிகப்பிரசண்டிகளா 
28 Dec 13


என்னுடைய வெள்ளிக்கிழமை நிலைத்தகவல் ஒன்றுக்கான பதில்கள், கருத்துரைகள் பற்றி எழுந்த சர்ச்சைகள், வாதங்கள், விவாதங்கள் பற்றி என் பக்க விளக்கம்...

சும்மா தேவையற்ற வாதங்களினால் நட்பு முறிதல்களும், மனப் பிரிதல்களும் வேண்டாமே...

சரியானதை, சரியாகப் புரிந்துகொள்வோம்.

நண்பர்ஸ்,
நான் முன்பிருந்தே சொல்வது போல, 80கள் முதல் 90களின் ஆரம்பம் வரை இசைஞானி ரசிகன், 90கள் முதல் ரஹ்மான் மிக வளர்ந்தவரை - எம் ரசனையின் சாதாரணம் தாண்டி எழுந்தவரை ரஹ்மான் ரசிகன், இப்போதும் எப்போதும் வித்யாசாகர் ரசிகன்.

ஆனாலும் எப்போதும் எவருடைய பக்தனும் கிடையாது.
பாலூத்துபவனும் கிடையாது.

நன்றாகக் கவனியுங்கள், ரஹ்மானின் அடக்கம் பற்றியே சொல்லியிருந்தேன்.
இளையராஜாவின் தலைக்கனம் பற்றி நான் எதுவுமே ஆரம்பிக்காதநிலையில் இந்த வாதமும் ஒப்பீடும் தர்க்கமும் (என்னைப் பொறுத்தவரையும் தேவையற்றதே) யார் மூலம் எங்கிருந்து ஆரம்பித்தது என்பதை முன்னைய status மூலம் அவதானியுங்கள்.
(வெள்ளி இரவு ரஹ்மானின் அடக்கம் பற்றி மட்டுமே சொல்லியிருந்தேன்.... ஆரம்பித்த சச்சரவின் புள்ளி எங்கே என்று கவனியுங்களேன்)

ஆனால் இரண்டு விஷயங்கள் மிகத் தெளிவாகச் சொல்வேன்.

1. ரஹ்மான் ரசிகர்கள் இல்லாத 'நடுநிலையாளர்களை'யும் ராஜாவின் எதிர் விமர்சகர்களாக, ரஹ்மான் ரசிகர்களாக மாற்றிவிடும் ஒரு வித விசித்திர மனோவியல்பு ராஜா பக்தர்களுக்கு (உண்மையான ராஜாவின் இசை ரசிகர்களை இதில் சேர்க்காதீர்கள்) இருக்கிறது.
இது ஏதோ ஒருவித superiority or indefinite inferiority complex.

2.இன்றைய ரஹ்மான் ரசிகர்களில் அநேகர் முன்னைய ராஜா ரசிகர்கள்; இப்போதும் ராஜாவின் அப்போதைய பாடல்களை ரசித்தவர்கள்.
அவர்கள் (நானும் உட்பட) ராஜாவின் முன்னைய சாதனைகளை, அவர் படைத்த அமரத்துவ கானங்களை குறைத்து கேவலப்படுத்தும் எண்ணமோ, ராசாவைத் தாழ்த்தித் தூற்றும் மனோநிலையோ கிடையாது.

ஆனால் அனேக ராஜா பக்தர்கள் ரஹ்மானை ஏற்றுக்கொள்வதும் கிடையாது.
அவரது சாதனைகளை மதிப்பதும் கிடையாது.
அவரது வளர்ச்சியை சகித்துக்கொள்வதும் கிடையாது.
ரஹ்மானின் ரசிகர்களையும் கொஞ்சம் தாழ்வாகவே பார்ப்பதுண்டு.

இந்த விஷயங்கள் தான் இணையப்பரப்பெங்கும் தேவையற்ற - முறையற்ற - இயல்பற்ற ராஜா - ரஹ்மான் ஒப்பீட்டுக்கும் சண்டைக்கும் சச்சரவுக்கும் காரணம்.

அமைதியாக இருக்கும் நடுநிலையாளர்களும் ராஜாவின் so called தலைக்கனம் பற்றி இழுத்து அவரை முறையற்றுத் தரம் தாழ்த்தவும் இவையே வழிகோலுகின்றன.

நல்ல இசையை ரசிப்போம்.
ஆனால் நல்ல மனிதரையும், நல்ல ரசிகரையும் நேசிப்போம்; மதிப்போம்; போற்றுவோம்.

Cheers & Cool :)))

29 Dec 13



தலைகீழாக நின்றாலும் எம் விருப்பப்படி நடக்காத இரு விஷயங்கள்..
தலைவிதி - அப்படி ஒன்று இருந்தால் 
தலை முடி - கண்ணுக்குத் தெரியும்படி இருந்தால்
29 Dec 13


ஆம் ஆத்மியும் அரவிந்த் கெஜ்ரிவாலும் நம்மவர்கள் எத்தனை பேரை எத்தனை விதமாக உசுப்பேற்றிவிடப் போகிறார்களோ?
தவறானவர்களைத் துடைப்பம் / துலைப்பம்
29 Dec 13


கெட்டிக்காரன் புளுகு எட்டு நாளாம்.
பவுன்ஸ், வேகத்துக்கு பாச்சா காட்டினவங்க பாடு ஒரு டெஸ்ட் போட்டிக்காம் 
3 Wickets more
#KallisTest
#SAvIND
30 Dec 13


2013...
அடடா..
நூறு மீட்டர் என்று நினைத்து ஒரு மரதன் ஓடிய உணர்வு.
ஒரு ஆண்டு என்று சும்மா விட்டுவிட முடியாத சகலவிதமான ஏற்றமும் தாழ்வும் ஓட்டமும் ஓய்வும் நிறைந்த ஆண்டு...
31 Dec 13


--------------------

என்னைப் போலில்லாமல் உங்களுக்கு 2013 மிக மகிழ்ச்சி நிறை ஆண்டாக இருந்திருந்தால் எனதும் மன மகிழ்ச்சியான வாழ்த்துக்கள்.

இல்லையேல் சென்றதினி மீளாது....​
இனி நடப்பது நல்லதாகட்டும்...

நம்பிக்கையோடு பிறக்கும் 2014ஐ மனம் நிறை மகிழ்ச்சியோடு எதிர்கொள்வோம்.

நல்லதை நினைக்கும் நம் எல்லோருக்கும் நல்லவற்றையும் மகிழ்ச்சியையும் பிறக்கும் 2014 கொண்டுவரட்டும்.

இனிய புது வருட வாழ்த்துக்கள். 




December 27, 2013

உந்தன் தேசத்தின் குரல்...

"உந்தன் தேசத்தின் குரல்
தொலைதூரத்தில் உள்ளதோ
செவியில் விழாதா. "

2004 சுனாமியை ஞாபகப்படுத்தும் பாடல் என்பதற்காகவே 2004இன் பின்னர் இந்தப்பாடலை ஒலிபரப்புவதையும் கேட்பதையும் தவிர்த்து வந்திருக்கிறேன்.

எப்போது கேட்டாலும் வரிகளிலும் இசையிலும், இசைப்புயலின் ஆழமான ஒரு ஈர்ப்பின் அடர்வு தொனிக்கும் குரலிலும் தொலைந்திடுவேன்.

அக்காலகட்டத்தில் சூரியனில் நாங்கள் ஆழிப்பேரலையால் பாதிக்கப்பட்டவர்களை மீண்டும் சேர்ப்பதற்கும், அவர்களுக்கான உதவிகளை சேர்ப்பதற்கும் முன்னெடுத்த 'உதவும் கரங்கள்' திட்டத்துக்கு இப்பாடலின் ரஹ்மான் இசையையும் வாலியின் அமரத்துவ வரிகளையும் பயன்படுத்தியிருந்தோம்.
(எந்த இசை + பாடல் என்று யோசிக்கையில் உடனடியாக நானும் விமலும் பிரதீப்பும் ஏகமனதாக முடிவெடுத்தது இப்பாடலைத் தான்)

ரஹ்மானின் மெட்டின் லயிப்பிலும், இசையோடு சேர்ந்துவரும் ஒரு கடலலைத் தாளம் போன்ற தொனிப்பும், மென் சோகம் தொனிக்கும் இசைக்கருவிகளின் கோர்ப்பும் அக்காலத்தில் ஒரு வகை இயல்பான சோகத்தை எங்கள் மனதுக்குள் ஓட வைத்துக்கொண்டே இருக்கும்.


ஆண்டுகள் சுழன்று மீண்டும் இன்று Vijay TVஇன் Super Singerஇல் இசைப்புயலின் முன்னால் ஒரு இளைஞன் பாடக் கேட்டபோது, அன்றைய நினைவுகள்...

வாலி இப்போது எங்களுடன் இல்லை.
இந்த ஆண்டில் மறைந்த பல பெரியவர்களில் ஒருவர்.

வாலியை ஞாபகப்படுத்திய A.R.ரஹ்மான், வாலி இப்பாடலை எழுதியபோது இலங்கைத் தமிழர் பற்றியும் சொல்லிவைத்தார் என்றார்.
ம்ம்ம்ம்....

ஆழிப்பேரலை கடந்து 9 வருடங்களும் ஒரு நாளும்....
காலம் சுற்றும் வேகம் அதிகம் தான். அத்துடன் கற்றுத் தரும் பாடங்களும் அதிகம் தான்.



"பால் போலுள்ள வெண்ணிலவு
பார்த்தால் சிறு கறையிருக்கும்
மலர்போலுள்ள தாய் மண்ணில்
மாறாத சில வலியிருக்கும் "

வாழ்க்கையின் முக்கியமான மகிழ்ச்சியின் தருணங்களைத் தந்து, அத்தோடே வாழ்க்கை என்பது வட்டம் என்பதை ருசுப்படுத்துவதாக பல பாடங்களையும் வடுக்களையும் சில முக்கிய மறைவுகளையும் அந்த மறைவின் வெற்றிடங்களையும் தந்து விடைபெற்றுக்கொண்டிருக்கும் 2013இன் இறுதிக்கட்டத்தில் மீண்டும் கவிஞர் வாலியையும்எங்கள் வாழ்க்கையையும் நினைவூட்டிய இன்றைய இரவின் சில நிமிடங்களுக்கு நன்றிகள்.

தாய்நாடு, தமிழா, தேசம், தமிழன், அயல் நாடு, அழைப்பு இப்படி பல சொற்கள் என்ன தான், எவ்வளவு தான் வருந்தி அழைத்தாலும், வலிந்து நினைத்தாலும் வாழ்க்கையுடன் ஒட்டாவிட்டாலும் கூட அதனுடனும் ஒரு இயலாமை சோகம் வந்து இசையுடன் சேர்ந்து மனம் அழும் ஒரு ஆறுதல் சோக சுகம் கூட இந்தப் பாடல் மனதோடு ஒட்டிவிட ஒரு காரணமோ?

----------
படம் : தேசம்(2004)
பாடியவர்: ஏ.ஆர்.ரஹ்மான்
பாடலாசிரியர்:வாலி
இசை : ஏ.ஆர்.ரஹ்மான்



உந்தன் தேசத்தின் குரல்
தொலைதூரத்தில் உள்ளதோ
செவியில் விழாதா.
சொந்த வீடுன்னை வாவென்று அழைக்குதடா தமிழா
அந்த நாட்களை நினை
அவை நீங்குமா உனை நிழல் போல் வராதா.
அயல் நாடுந்தன் வீடல்ல விடுதியடா தமிழா

வானமெங்கும் பறந்தாலும்
பறவை என்றும் தன் கூட்டில்
உலகம் எங்கும் வாழ்ந்தாலும்
தமிழன் என்றும் தாய்நாட்டில்
சந்தர்ப்பங்கள் வாய்த்தாலும்
அங்கு செல்வ மரம் காய்த்தாலும்
உள் மனத்தின் கூவல் உந்தன் செவியில் விழாதா?
உந்தன் தேசத்தின் குரல்
தொலைதூரத்தில் உள்ளதோ செவியில் விழாதா.
சொந்த வீடுன்னை வாவென்று அழைக்குதடா தமிழா

கங்கை உனை அழைக்கிறது
யமுனை உனை அழைக்கிறது

இமயம் உனை அழைக்கிறது பல சமயம் உனை அழைக்கிறது
கண்ணாமூச்சி ஆட்டம் அழைக்கும்
சின்ன பட்டாம்பூச்சி கூட்டம் அழைக்கும்
தென்னந்தோப்பு துறவுகள் அழைக்க
கட்டிக்காத்த உறவுகள் அழைக்க
நீதான் தின்ற நிலாச்சோறுதான் அழைக்க
உந்தன் தேசத்தின் குரல்
தொலைதூரத்தில் உள்ளதோ செவியில் விழாதா.
சொந்த வீடுன்னை வாவென்று அழைக்குதடா தமிழா

பால் போலுள்ள வெண்ணிலவு
பார்த்தால் சிறு கறையிருக்கும்
மலர்போலுள்ள தாய் மண்ணில்
மாறாத சில வலியிருக்கும்
கண்ணீர் துடைக்க வேண்டும் உந்தன் கைகள்
அதில் செழிக்க வேண்டும் உண்மைகள்
இந்த தேசம் உயரட்டும் உன்னாலே
மக்கள் கூட்டம் வரட்டும் உன் பின்னாலே
அன்புத் தாயின் மடியுன்னை அழைக்குதே தமிழா
உந்தன் தேசத்தின் குரல்
தொலைதூரத்தில் உள்ளதோ செவியில் விழாதா.
சொந்த வீடுன்னை வாவென்று அழைக்குதடா தமிழா
செவியில் விழாதா….

December 26, 2013

செக்ஸ் !!! - தேடல் சொல்வது - இலங்கையும் கூகிளும்

எல்லாருமே கூகிள் தேடலில் 'செக்ஸ்' பற்றித் தேடி இலங்கையர் சாதனை படைத்ததை 'பெருமை'யோடு பகிர்ந்து கொள்வதை அவதானிக்கிறோம்.

ஆனால் கூகிள் தேடலில் கடந்து செல்லும் இந்த 2013ஆம் ஆண்டில் அதிகமாகத் தேடப்பட்ட விடயங்கள் எவை?

ஒவ்வொரு பிரிவாக கூகிளில் தேடப்பட்ட விடயங்கள் / பெயர்கள் தொடர்பாக கூகிளின் உத்தியோகபூர்வ Zeitgeist report வெளியிட்டுள்ள தகவல்கள் பலருக்கும் ஆச்சரியத்தைத் தரலாம்.

http://www.google.com/trends/topcharts?zg=full&hl=en

அதிகமாகத் தேடப்பட்ட நபர்களாக காலமான தென் ஆபிரிக்க மாமனிதர் நெல்சன் மண்டேலா மற்றும் விபத்தில் மரணித்த போல் வோக்கர் ஆகியோர் இருப்பார்கள் என்பது அனைவருமே ஊகிக்கக் கூடிய விடயங்களே...

ஆனால் இன்னொரு பரபரப்பு நபரான எட்வேர்ட் ஸ்னோடன் - அமெரிக்காவின் தற்போதைய முக்கிய எதிரி முதல் முக்கிய  தேடல்களில் இல்லை என்பது ஆச்சரியமே.

அதிகமாகத் தேடப்படும், விடயங்களில் Apple நிறுவனம் அண்மையில் வெளியிட்ட iPhone 5 s மூன்றாவது இடத்தைப் பெற்றுள்ளது.

2013இல் நடந்த சம்பவங்களில் அமெரிக்க அரசு ஸ்தாபனம் மூடப்பட்டமை முதல் இடத்தையும் அடுத்த  பிரேசிலில் இடம்பெறப்போகின்ற உலகக் கிண்ணக் கால்பந்துப் போட்டித்தொடர் இரண்டாம் இடத்தையும் தேடலில் பெற்றுள்ளன.



திரைப்படங்களில் Man of Steel மற்றும் Iron Man 2 ஆகிய எதிர்பார்த்த 2013இன் பிரம்மாண்ட இரு திரைப்படங்கள் முந்தியுள்ளன.

கூகுளில் அதிகமாகத் தேடப்பட்ட விளையாட்டு வீரராக எந்தவொரு வீரரையும், வீராங்கனையையும் முந்தி -  தன் காதலியைக் கொன்ற தென் ஆபிரிக்க விசேட தேவைக்குரிய மெய்வல்லுன வீரரான ஒஸ்கார் ப்ரிட்டோரியஸ் தேடப்பட்டுள்ளார்.

சர்வதேச கிரிக்கெட்டிலிருந்து ஓய்வை அறிவித்து கிரிக்கெட் பக்தர்களைக் கவலையுற வைத்த 'கடவுள்' சச்சினோ, கால்பந்தாட்ட தெய்வங்கள் மெஸ்ஸி, ரொனால்டோ ஆகியோரோ முதல் ஐந்துக்குள்ளேயே இல்லை.

ஆனால் ஊக்க மருந்துப் பாவனையால் சர்ச்சை கிளப்பிய சைக்கிளோட்ட வீரர் லான்ஸ் ஆர்ம்ஸ்ஸ்ட்ரோங் ஐந்தாம் இடத்தில்.
கோக்கு மாக்கு செய்தால் தான் தேடப்படுவோம் போல..

இந்த வருடத்தில் கூகிள் பாவனையாளர்களால் உலகளாவிய ரீதியில் அதிகம் தேடப்பட்ட முதல் 1௦

1. Nelson Mandela
2. Paul Walker
3. iPhone 5s
4. Cory Monteith
5. Harlem Shake
6. Boston Marathon
7. Royal Baby
8. Samsung Galaxy S4
9. PlayStation 4
10. North Korea

இலங்கையர் அதிகமாகத் தேடியது பாலியல் சார்ந்த விஷயமாக இருப்பதில் ஆச்சரியம் ஒன்றும் இல்லைத் தான்.  அது தான் தினமும் பத்திரிகைகள் காவி வரும் பாலியல் வரட்சி + வன்முறை செய்திகள் சொல்கின்றனவே.


படம் - Daily Mirror 

ஆனால் எனக்கென்ன ஆர்வம் என்றால் முதல் பத்து இடங்களில் கூகிளில் நம்மவர்கள் தேடிய ஏனைய முக்கிய விடயங்கள் என்னென்ன என்று தெரிந்துகொள்வது தான்.

Daily Mirror இணையத் தளத்தில் வெளியான இந்தத் தகவல்கள் சில விஷயங்களைத் தெளிவுபடுத்தியுள்ளன.

இலங்கையர்கள் ஆர்வமுடன் இந்த ஆண்டில் தேடிய முதல் பத்து பாலியல் சார்ந்த விடயங்கள்....


சீ.. கருமம் என்று யோசிப்பதை விட தெரியாத விஷயங்களைத் தெளிவு படுத்திக்கொள்ளப் பார்க்கிறார்கள் என்றும் கிடைக்காத விஷயங்களுக்கான வறட்சியைப் போக்கிக்கொள்ள வலையைப் பயன்படுத்துகிறார்கள் என்றும் பார்க்கலாம்.
ஆனால் ஆக்கபூர்வமாக (?) பயன்படுத்தும் எம்மில் பெரும்பாலானோருக்கு அவமானத்தை இந்தத் தேடல் சிகாமணிகள் ஏற்படுத்தித் தந்துள்ளார்கள் என்ற கடுப்பும் வேறு.

மேல் மாகாணத்தில் நுகேகொட, ஹோமாகம ஆகியன முன்னிலை 'செக்ஸ்' தேடல் நகரங்களாம். கண்டியும் காலியும்அந்தந்த மாகாணங்களில் முன்னிலை.

இதில் இன்னொரு விடயத்தையும் நோக்கவேண்டும்.
பாலியல் சார்ந்த விடயங்கள் என்றவுடன் 'அப்பாவி'களான நம்மவர்கள் உடனடியாக பயன்படுத்தும் ஒரு சொல் SEX என்பதே....

இதனால் தேடல் 'பொறிகளில்' சிக்கிக் கொண்டார்கள்.
இலங்கையின் பின்னால் வரிசை கட்டி வந்துள்ள அப்பாவி, அபிவிருத்தியடைந்து வரும் நாடுகளின் மக்கள் எல்லாருமே அப்படித்தான்.

பெரியண்ணன் இந்தியாவின் பெரும்பாலானோரும் உட்பட.

ஆனால் மேலைத்தேயத்தவர்கள் அப்படியான விஷயங்களுக்கேன்றே வைத்துள்ள பல்வேறு ராகம் ரகமான பதங்களினைத் தத்தம் தேவைகளின் பிரகாரம் பயன்படுத்துவதால் தப்பியிருப்பார்கள்.
(இது என் பக்க ஊகம் மட்டுமே)


இன்னும் இலங்கையர் தேடியவை என்ன, எவை பற்றி என்று முழுதாக அறிந்துகொள்ளும் ஆர்வம் இருக்கிறது.

சராசரிக்கும் சற்று கீழான இணையம் சார்ந்த தொழிநுட்ப அறிவுகொண்ட அடியேன் இதற்காக தொழிநுட்பப் புலிகள், இணையத் திமிங்கிலங்களிடம் இது பற்றி இன்னமும் தேடித் துளாவிக்கொண்டே இருக்கிறேன்.

http://www.google.com/trends/explore#geo=LK&date=1%2F2013%2012m&cmpt=q

http://www.google.com/trends/explore#geo=LK&date=today%2012-m&cmpt=date

இப்படியான தேடல் முடிவுகள் கிடைத்தாலும் இன்னும் பூரண திருப்தியில்லை.

ஆர்வமுள்ளவர்கள் கொஞ்சம் பயனுள்ளதாக இப்படியும் தேடிப்பாருங்களேன்.



December 23, 2013

விளையாட்டு ஊடகவியல் - வாய்ப்புக்களும் வாழ்க்கையும்

சில மாதங்களுக்கு முன்பு 'விளையாட்டு ஊடகவியல்' பற்றியொரு கட்டுரை Edex சஞ்சிகைக்கு வேண்டுமென்று சகோதரன் ஒருவர் கேட்டிருந்ததால் எழுதி அனுப்பியிருந்தேன்.

அதைப் பின்னர் இடுகையாக வலைப்பதிவில் இடவேண்டுமென்று யோசித்திருந்தாலும் மறந்தே போயிருந்தேன். அண்மையில் அலுவலகத்தில் என்னுடன் வேலை செய்யும் தம்பியொருவர் தன்னுடைய உயர்கல்வி ஒப்படையொன்றுக்கு இதே தலைப்பில் என்னுடைய கட்டுரை ஏதும் இருக்குமா என்று கேட்டபோது தான் இது பற்றி ஞாபகம் வந்தது.

பிரசுரிக்கப்பட்டதிலிருந்து சிற்சில மாற்றங்களோடு...


விளையாட்டு ஊடகவியல் - வாய்ப்புக்களும் வாழ்க்கையும் 





விளையாட்டு என்ற வார்த்தையே விளையாட்டாகிப் போயுள்ள ஒரு காலம்.. ஆனால் விளையாட்டு வீரர்கள் இப்போது சம்பாதிக்கும் புகழும் பெயரும் பணமும் விளையாட்டான விடயம் அல்ல.. ஆனால் விளையாடாவிட்டாலும் வெளியே இருந்தும் இந்த விளையாட்டுக்கள் மூலமாக எமக்கு என்று ஒரு தொழில்துறையை உருவாக்கக் கூடிய ஒரு வழிவகை பற்றிப் பார்க்கலாம். 

ஊடகங்கள் பல்கிப் பெருகி ஆதிக்கம் செலுத்தி, இளைஞர்களின் மேல் தாக்கம் செலுத்தும், இளைஞர்கள் ஆர்வம் கொண்டுள்ள இந்தக் காலத்தில் ஊடகவியல்/ இதழியல் - Journalism  என்ற வார்த்தை அதிகமாகப் பரவியுள்ளது. 

தற்போதுள்ள காலகட்டத்தில் ஊடகவியல் துறையை இரண்டு வகைகளாகப் பிரிக்கலாம். ஒன்று அச்சு ஊடகத்துறை, மற்றொன்று மின்னணு / இலத்திரனியல் ஊடகத்துறை.

இதில் அச்சு ஊடகத்துறை என்பது அச்சில் வெளிவரக்கூடிய தினசரி, வார, மாத இதழ்களைக் குறிக்கிறது. 
பாரம்பரிய ஊடகத்துறையின் முன்னோடி இது. இவற்றில் பத்திரிகையின் முதன்மை ஆசிரியருக்குக் கீழ் உதவி ஆசிரியர்கள், நிருபர்கள், சிறப்பு செய்தியாளர்கள், பத்தி எழுத்தாளர்கள் என்ற பதவிகளில் பணி புரிய வாய்ப்புகள் உண்டு.

இப்போது முன்பு போலன்றி தனியாக விளையாட்டுக்கேன்றே  பத்திரிகைகள்,சஞ்சிகைகள் வெளிவருவதால் இன்னும் ஏராளமான தொழில் நிலை வாய்ப்புக்கள் உள்ளன.
கார்ட்டூனிஸ்ட், புகைப்படக் கலைஞர், பிழை திருத்துனர், வரைகலை வடிவமைப்பாளர், பக்க வடிவமைப்பாளர் என வேறு பல வேலைகளும் இதில் உள்ளன.

இலத்திரனியல் ஊடகத்துறை என்பது வானொலி, தொலைக்காட்சி, இணையத்தளம் (இப்போதெல்லாம் Facebook, Twitter மூலமாகக் கூட) போன்ற ஊடகங்களை உள்ளடக்கியது. அச்சு ஊடகத்துறையில் இருந்து இது வேறுபட்டது; நவீனமயமானதும் கூட. 

இலத்திரனியல் ஊடகங்களில் (செய்தி) ஆசிரியர், உதவி ஆசிரியர்கள், நிருபர்கள், புகைப்பட / வீடியோக் கலைஞர்கள், ஒளி- ஒலிப்பதிவாளர்கள், தொழில்நுட்பக் கலைஞர்கள், செய்தி வாசிப்பாளர், இணையத்தில் பக்க வடிவமைப்பாளர், (தொலைக்காட்சி) அரங்கு அமைப்பாளர் என பல்வேறு வகைகளில் வேலைவாய்ப்பு உள்ளன.

முன்னைய காலங்கள் போலன்றி ஒவ்வொரு துறையிலும் ஏராளமான விசேடத்துவ நிபுணர்கள் தேவைப்படுவதால் விளையாட்டு செய்திகளைத் தொகுப்பதற்கும், துரிதமாக செய்திகளை வழங்குவதற்கும், பூரணமான விளையாட்டு விஷயங்களை எழுதுவதற்கும்,சிறப்புக்கட்டுரைகள் எழுதுவதற்கும் எனத் தனித்தனியாக விளையாட்டு ஊடகவியலாளர்கள்/ இதழியலாளர்கள் (Sports Journalists) இப்போது அவசியப்படுகிறார்கள். 

Journalists (reporters) - நிருபர்கள்/ இதழியலாளர்கள்
Editor · - ஆசிரியர் 
Columnist - பத்தி எழுத்தாளர்
Copy editor - பிரதி ஆசிரியர்
Meteorologist - வானிலை நிருபர்  
News presenter - செய்தி வாசிப்பாளர்
Presenter - தொகுப்பாளர் 
Photographer - புகைப்படப்பிடிப்பாளர்
Pundit/Political commentator - துறைசார் வல்லுனர்கள்
 

என்று விதவிதமான வகிபாகங்கள் ஒவ்வொரு விளையாட்டு இதழியல் பிரிவிலும் பிரதானமாக இருக்கின்றன. இதில் எங்கள் நோக்கம் எதுவோ, எங்களது ஆர்வம் எதிலோ அதை நாம் தெரிந்தெடுத்துக்கொள்வதன் மூலமாக ஒரு விசேடத்துவத் தொழிற்துறையில் பணிபுரியலாம். 


சாதாரணமாகவே இந்தக் கால இளைஞர்கள் விளையாட்டுக்களில் ஆர்வம் கொண்டவர்கள்;எமது அன்றாடப் பேசு பொருட்களில் ஒன்றாக இருக்கும் இவ்விளையாட்டை (அது கிரிக்கெட்டோ அல்லது கால்பந்தோ ஏன் ஹொக்கியோ) ரசிக்கும் பொழுதுபோக்கு என்பதைத் தாண்டி, எமது வாழ்வாதாரத் தொழில்துறையாக மாற்றுவது எமது வாழ்க்கையை ரசனை மிக்கதாக மாற்றும்.

ஆங்கில மொழி ஊடகங்களிலேயே இதற்கான வாய்ப்புக்கள் மிக அதிகமாகக் காணப்பட்டாலும், தமிழிலும் விளையாட்டு இதழியலுக்கான தேவையும், எதிர்பார்ப்பும் அதிகமாகவே இருக்கிறது. இப்போது தமிழிலும் விளையாட்டு செய்திகளுக்கான தனியான இடம் தொலைகாட்சி, வானொலி, பத்திரிகைகள், சஞ்சிகைகள், இணைய வழி வாசிப்புக்கள் என்று பல்கிப் பெருகி வருவது ஆரோக்கியமான ஒரு மாற்றம். 

விளையாட்டுக்களின் பொற்காலம் என்று அழைக்கப்படும் (Golden Age of Sports) முதலாம் உலக மகா யுத்தத்துக்கு பிற்பட்ட ஆண்டுகளில் அமெரிக்கா மற்றும் ஐரோப்பிய நாடுகளில் வளர்ச்சியடைந்து படிப்படியாக செழுமைப்பட்ட இந்த விளையாட்டு இதழியல் எங்கள் பகுதிகளுக்கு வர நீண்ட காலம் எடுத்தது; அதிலும் எமக்கு நெருக்கமான எமது தாய் மொழியில் வருவதற்கு இன்னும் அதிகமான காலம் தேவைப்பட்டது.

விளையாட்டா? அது அளவோடு இருந்தால் காணும் என்று தான் எம்மவர்களின் உளப்பாங்கு அண்மைக்காலம் வரை இருந்திருக்கிறது.
ஆங்கில ஊடகங்களில் இந்நிலை சில காலத்திற்கு முன்னரே மாறினாலும் கூட, தமிழின் அச்சு ஊடகங்களில் அண்மைக்காலம் வரை (சிலவற்றில் இன்றும் கூட) கடைசிப் பக்கம் அல்லது ஓரிரு பக்கங்கள் தான் விளையாட்டுக்கு.

இணையங்கள் துரிதமாக மாறிக்கொண்டன. வானொலி, தொலைக்காட்சிகள் இளைஞரின் விளையாட்டு மீதான தாகத்தைப் புரிந்து தமது வழிகளை மாற்றிக்கொண்டன.

ஆங்கிலத்திலும் சர்வதேச ரீதியிலும் 1920களில் தான் விளையாட்டுப் பத்தி எழுத்தாளர்கள், விமர்சகர்கள், விளையாட்டுக்கென்று தனியான தொகுப்பாளர்கள் ஆகியோர் உருவாக ஆரம்பித்தார்கள். 
நேரடி ஒலி, ஒளிபரப்புக்கள் வரவேற்பையும், முக்கியத்துவத்தையும் பெற ஆரம்பிக்க தனியான தொழில்வாய்ப்புக்களும், தேர்ச்சிகளும் அதிகரித்தன.
ஆனால் தனியான விளையாட்டு ஒலி/ஒளிபரப்புக்கள், சஞ்சிகைகள் வெளிவர ஆரம்பித்தது 1950ஆம் ஆண்டுக்குப் பிறகு தான். 

இப்போது இந்த விளையாட்டு ஊடகவியலின் உச்சக்கட்டம் என்று சொல்லலாம்.. 



சகல விளையாட்டுக்களும் பணம் கொழிப்பதாக, பிரபல்யத்தின் முக்கிய வழிகோலாக, பொழுதுபோக்கின் வடிகாலாக, அதிகம் இளைஞர்களின் பேசுபொருளாக, சமூக வலைத்தளங்களின் 'முக்கிய' பரபரப்பு விடயமாக மாறியுள்ளன.

நான் ஒலிபரப்பாளனாக தொழில் பெற்று, பின் கிரிக்கெட் போட்டிகளுக்கு நேரடியாகச் சென்று நேரடிக் களத் தகவல்களைத் (updates) தர ஆரம்பித்தவேளை - பாரம்பரிய நேரடி ஒலிபரப்பிலிருந்து (இலங்கையைப் பொறுத்தவரை தமிழில் நேரலை நேர்முக வர்ணனைக்கு வாய்ப்பு எப்போதுமே updates போலத்  எல்லோரும் அறிந்ததே) வேறுபட்டிருந்த இவ்வகை நிகழ்வுகள் எங்களுக்கும் விளையாட்டு ஒலிபரப்பாளர் - sportscaster என்ற பதத்தை எங்களுக்கும் வழங்கியது.

இப்போது துடிப்பான பல பெண் விளையாட்டு ஒலிபரப்பாளர்களையும் காண்கிறோம்.

சம்பாதிக்கும், சாதிக்கும் துறைகளாக இவை மாறியுள்ளதோடு, ஏனைய துறைகளைப்போல அல்லாமல், அல்லது அவற்றை விட அதிகமாக செய்திகள், களநிலவரங்கள், சுவாரஸ்ய சம்பவங்கள் துரித கதியில் நிமிடத்துக்கு நிமிடம் புதுப்பிக்கப்பட்டுக்கொண்டே இருக்கும் துறை விளையாட்டுத்துறை தான்.

இதனால் புள்ளிவிபரங்களுக்கும் புதிய தகவல்களுக்கும் தட்டுப்பாடு இருக்காது.
எந்நேரமும் பரபரத்துக்கொண்டே இருக்கும் ஒரு துறை என்பதால் எதிர்காலத்துக்கான அதிக வாய்ப்புள்ள, பரந்து விரியக்கூடிய ஒரு தொழில் துறையாக இது இருக்கும் என்பது நிச்சயம்.

நான் அறிந்த பல நண்பர்கள் ஆங்கில மொழி மூலமான விளையாட்டு ஊடகங்களில் புள்ளி விபரவியலாளர்களாக (statisticians), தேடல் + விபர சேகரிப்பாளர்களாக இன்னும் தகவல் சேமிப்பாளர்கள் மற்றும் இவற்றைத் தொகுத்துக் கட்டுரையாக்குபவர்களாக தொழில் செய்கிறார்கள்; கை நிறைய சம்பாதிக்கிறார்கள்.

தமிழில் இவ்வாறு ஒரு விசாலித்த பரப்பு எப்போது உருவாகும் என்று நானும் ஏங்குவது உண்டு.
ஒரு சிலர் ஆரம்ப முயற்சிகளை மேற்கொண்டாலும் தமிழ் மூலமான வாசகர்களின் எண்ணிக்கை ஒப்பீட்டளவில் குறைவென்பதால் பொருளாதார இலாபம் பற்றி நோக்குமிடத்தில் நடக்க  சில காலமாகலாம்.

ஆனால், விளையாட்டு ஊடகவியல் இப்போது முன்னர் ஒரு காலத்தில் நாம் யாரும் எதிர்பார்த்திருந்திராத பாரிய புதிய தொழில் பிரிவுகள் காலமாற்றத்துக்கேற்ப ஊடகவியலிலும் தோன்றியுள்ளன.
சிறு உதாரணமாக,
அரசியல், நிதியியல் என்று மட்டும் இருந்த புலனாய்வு இதழியல்/ ஊடகவியல் இப்போது விளையாட்டுத் துறையிலும் வந்திருக்கிறது. (பின்னே.. சூதாட்டம், பந்தயம் என்று வந்தால் இதுவும் வரத்தானே வேண்டும்)

இப்போது தமிழிலும் இந்த விளையாட்டு இதழியலின் தேவை உணரப்படும் நேரம் எமது ஆர்வத்தையும் பொழுதுபோக்குக்கான நேரத்தையும் பொன்னாக மாற்றிக்கொள்ளும் இப்படியான வாய்ப்பு எங்கள் வாழ்க்கைப் பாதைக்கான நல்ல வழிகாட்டியாக அமையுமே.. 
பயன்படுத்திக்கொண்டால் நாம் தான் வெற்றியாளர்கள்.

இணையத்தில் pdf வடிவில் உள்ள Edex கட்டுரை http://magazine.edex.lk/v02_i04/sports_journalism_Tam.pdf



Related Posts Plugin for WordPress, Blogger...

ரசிக்க,சுவைக்க,சிரிக்க - கிளிக்குங்க..


View My Stats

Subscribe via email

Enter your email address:

Delivered by FeedBurner

Certified