September 30, 2013

ராஜா ராணி



ஷங்கர் பாசறையில் பட்டை தீட்டப்பட்ட கூர் வாள், மணிரத்னத்தின் பாணியில் குத்திப் பார்த்திருக்கிறது.
கூர்வாளின் இலக்குத் தவறியதா தவறாமல் குத்தியதா என்பதை விட,வாள் வீரியமானது, விஷயமுள்ளது என்பதை உணர்த்தியிருக்கிறது ராஜா ராணி.


ஷங்கரின் வாரிசுகளில் ஒன்று என்றவுடன் எதிர்பார்ப்பின் அழுத்தமே அவரைத் தடுமாற வைத்துவிடும்.
ஆனால் அட்லீ அதையெல்லாம் அசாதரனமாகத் தூக்கி லாவகமாக இக்கால இளைஞர்களைக் குறிவைத்துப் படமாக்கி, இந்தக் காலத்தின் Trend என்னவோ (அது சந்தோஷத்திலிருந்து சாவு வீடு வரை சரக்கடிப்பதிலிருந்து, சந்தானம், நஸ்ரியா, சர்வசாதாரணமாக வாழ்க்கையை இலகுவாக எடுத்துக்கொள்ளும் இளைஞர்கள் என்று நிறைய) அதை சரியான கலவையாகக் கொடுத்து இளைஞர்களை ராஜா ராணி பற்றி பேசச் செய்திருக்கிறார்.

அட்லீக்கு ஒரு கச்சிதமான விசிட்டிங் கார்ட் இது.

மணிரத்னம் கூட இந்தக் காலத்தில் மௌன ராகத்தை எடுத்திருந்தால் இப்படித்தான் எடுக்கவேண்டும்.
இதனால் தானோ என்னவோ அட்லீ 27 ஆண்டுகள் கழித்து மௌன ராகத்தை மெருகேற்றி இக்கால இளைய சந்ததிக்குக் கொடுத்திருக்கிறார்.
(மணிரத்தினத்தின் மௌனராகம் 1986ஆம் ஆண்டு வெளிவந்திருந்தது)

மனம் விரும்பாமல் மற்றவருக்காக சேர்கின்ற ஜோடியின் மணவாழ்வு தான் கதை என்றவுடன் அது 'மௌன ராகம்' தான் என்று முடிவு கட்டிவிடும் எம்மவருக்கு அதை இந்தக் காலத்துக்கு ஏற்ப கொடுக்கவேண்டும் என்பது தான் அட்லீக்கு இருந்த சவால்.


என்ன சில வித்தியாசங்கள்....
அதிலே ரேவதிக்கு மட்டும் தி.மு (திருமணத்துக்கு முன்னர்) காதல் இருந்தது.
இதிலே இருவருக்கும்.
சந்தானம் போல ஒருவர் பழைய மெளனராகத்தில் இருக்கவில்லை.
படம் முழுக்க மௌனராகம் போல மென்சோகத்தோடு நகராமல், ஆர்யா, சந்தானம், நஸ்ரியா, ஜெய், நயன்தாரா என்று அத்தனை பேருமே கலகல என்றே நகர்த்துகிறார்கள்.
இதனால் ராஜா ராணி புதிய நகைச்சுவைப் பாணி  தோய்த்து எடுக்கப்பட்ட பழைய பலகாரக் கலவை.


ஆர்யா - நயன்தாராவின் 'கெமிஸ்ட்ரி'யை சமயோசிதமாகப் பயன்படுத்தியது முதல், சகல விதத் தொழிநுட்பம், ஒளிப்பதிவு நுட்பங்கள் போன்றவற்றை அளவுக்கதிகமாகப் பயன்படுத்தித் திகட்ட வைக்காமல் அளவாக, ரசிக்கும்படி பயன்படுத்தியமை, சத்யராஜ் என்ற தமிழின் அமிதாப் பச்சனைத் தேவையான அளவு பயன்படுத்தியது என்று அட்லீ பாராட்டுக்குரியவராகிறார்.

ஆர்யா - நயன்தாரா ஜோடி 
ஆர்யா - நஸ்ரியா ஜோடி 
ஜெய் - நயன்தாரா ஜோடி ஆகியவற்றில் 

Brother - Sister (ஆர்யா - நஸ்ரியா) ஜோடிப் பொருத்தம் அழகாகவும் பொருத்தமாகவும் இருக்கிறது.

அந்தக் காதல் ஆரம்பிப்பதிலிருந்து accident வரை அப்படியொரு ஈர்ப்பும், ரசிப்பும்.
சந்தானம் - ஆர்யா நகைச்சுவைகளும் கலை கட்டுகின்றன அந்த இடங்களில்.
சங்கரைத் தாண்டி மணி அட்லீக்குள் புகுந்துள்ளார் இந்தக் காட்சிகளில்.
(நாய்க்குட்டி, செக் ஆகிய இரண்டும் கூட முக்கிய பாத்திரங்களாகி விடுகின்றன)

நயன்தாரா ஹீரோக்கள் இரண்டு பேருக்குமே அக்கா போலத் தெரிவது எனக்கு மட்டும் தானா?
அதிலும் நயன் கல்லூரி மாணவியாம்; ஜெய்யை போட்டு உருட்டி எடுக்கும் காட்சிகளில் ஏகனில் வந்த விரிவுரையாளர் நயன்தாரா தான் ஞாபகம் வருகிறார்.

வயது ஏறியது போல் தெரிந்தாலும் நடிப்பிலும் மெருகு ஏறியுள்ளது.
ஆனால் அழுகின்ற காட்சிகள் நிறைய இருப்பது அவரது வாழ்க்கையை நினைத்து அழுகிறாரோ என்றும் எண்ண வைக்கிறது.

ஆர்யா - smart ஆக இருக்கிறார். நடிப்பில் நேர்த்தி. நஸ்ரியாவிடம் வழியும் காட்சிகளிலும், பின்னர் குடித்துவிட்டு அலம்பல் விடும் காட்சிகளிலும் கலக்கல்.

ஆனால் எல்லோரையும் பின் தள்ளி அதிகமாக ஸ்கோர் செய்துகொள்ளும் இருவர் ஜெய் & சந்தானம்.

அப்பாவி + பயந்தாங்கொள்ளியாக வரும் ஜெய் அழுவதும், அஞ்சுவதுமாக அப்பாவி நம்பர் 1 என்று அத்தனை போரையும் ஈர்த்துவிடுகிறார்.
அந்தக் குரலும் அப்பாவி மூஞ்சியும் அவருக்கென்றே வார்த்த பாத்திரமாக்கி விடுகின்றன.
அந்தக் கெஞ்சலும் பயந்துகொண்டே பார்க்கும் பார்வையும் இன்னும் மனதில் நிற்கின்றன.


அடுத்தவர் சந்தானம்... மனிதர் படத்தில் எல்லோரையும் விட முன்னுக்கு நிற்கிறார்.
சோகக் காட்சியா, கலாய்க்கும் காட்சியா சந்தானத்தின் punch வசனங்கள் திரையரங்கைக் கலகலக்க வைக்கின்றன.
"நண்பனில் நல்ல நண்பன், கெட்ட நாண்பன் என்றெல்லாம் கிடையாது. நண்பன் என்றாலே அவன் நல்லவன் தான்."

"லவ் பெயிலியருக்கு அப்புறம் லைபே இல்லைன்னு சொன்னா, 25 வயசுக்குப் பிறகு இங்கே எவனும் உயிரோடயே இருக்க மாட்டான்"

"லவ்வுக்கு அப்புறம் ஒருத்தன் குடிச்சான்னா அது லவ் பெயிலியர்; ஆனா கல்யாணத்துக்கு அப்புறம் குடிச்சான்னா லைபே பெயிலியர்"

இப்படியான வசனங்கள் எல்லாம் இனி அடிக்கடி பயன்படுத்தப்படும்.

முன்னைய படங்களில் கவுண்டமணி யாராயிருந்தாலும் கலாய்த்தே தள்ளுவது போல இப்போது சந்தானம்.
யார் வந்தாலும் போட்டுத் தாளிக்கிறார்.


ஆர்யா - நயன் வீட்டுஸ் சண்டைகள், கண்ணாடிக்கு முன்னாள் நிற்கும் காட்சிகள் நவீன யுக்திகளோடு ரசனையாகப் படம் பிடித்திருக்கிறார்கள்.

ஒளிப்பதிவு - George. C. Williams
படத்தொகுப்பு - Anthony L. Ruben (இவர் அந்தப் பிரபல எடிட்டர் அன்டனி இல்லையே?)
இருவருக்குமே வாழ்த்துக்கள்.

இரண்டாம் பாதிப் படம் நொண்டியடித்து மிக வேகம் குறைவாக நகரும்போது சந்தானத்தின் கொமெடி தான் ஒரு பெரிய ஆறுதல்.

பாடல்களிலும் "ஓடே ஓடே" & "ஹேய் பேபி" ஆகிய இரண்டும் மட்டுமே இப்போ வரை மனசில் நிற்கிறது.

இரண்டாம் பாதி இழுவையும் ஊகிக்கக் கூடிய காட்சித் திருப்பங்களும் படத்தை மொக்கை ஆக்கிவிடுகின்றன.

அத்தனை ரசனையான விடயங்களைப் பார்த்துப் பார்த்துப் படமாக்கிய அட்லீ ஜெய், நஸ்ரியா ஆகியோரின் பாத்திரங்களைப் படத்திலிருந்து 'இறந்து' போக வைத்த இடங்களிலும், மீண்டும் ஜெய்யை வரவைத்த இடத்தையும் கவனித்திருக்க வேண்டாமா?

மோகன், ரேவதி, மணியோடு ஒப்பிடாமல் கலகலப்புப் படமாக ராஜா ராணியைப் பார்த்தாலும், சந்தானத்தின் சிரிப்புக்கள் எல்லாப் படங்களிலும் பார்ப்பவையாக இருப்பதாலும், இரண்டாம் பாதி இழுவையாலும் - அந்த divorce கேட்கும் காட்சியும் சேரும் விதமும் மௌன ராகத்தை ஞாபகப்படுத்துவதாலும் ராஜா ராணி மௌன ராகத்தின் 2013 பதிப்பே தான்.

ஆனால் மௌன ராகத்தில் இளையராஜா மணி ரத்னத்துக்குக் கை கொடுத்த அளவில் G.V.பிரகாஷ் புதுமுகத்துக்குப் பெரியளவில் உதவவில்லை என்பதை சொல்லியே ஆகவேண்டும்.

இதனால் இனித் திறமையான ஒரு இயக்குனராகத் தன்னை வெளிப்படுத்தக் காத்திருக்கும் அட்லீக்கு ஒரு வாத்சல்யமான, ஊக்கமளிக்கக் கூடிய வரவேற்பை வழங்கி வைப்போம்.
(குருநாதர் ஷங்கரின் பாதிப்பில்லாமல் - அந்த விபத்துக் காட்சி + சில ஒளிப்பதிவு கோணங்கள் தவிர - நம்பிக்கை தரும் படைப்பாளியாக வந்திருக்கிறார்)

இவரது அடுத்த படத்தை ஆவலோடு காத்திருப்போம்.


ராஜா ராணி - Remix (மௌன) ராகம் 

(remix, remake எல்லாமே ஒரிஜினல் போல சுவையாக அமைவதில்லையே)


ஒரு முக்கிய குறிப்பு/ ஆதங்கம்/ புலம்பல்...
அதுசரி, இளம் இயக்குனர்கள் எல்லாருமே தங்கள் படங்களில் மதுபானக் காட்சிகளை அண்மைக்காலத்தில் இத்தனை அதிகமாகப் பயன்படுத்தும் அளவுக்கு எங்கள் இளைஞர்கள் அவ்வளவு மொடாக் குடியர்களா?
காதல் காட்சிகள், நட்பை வெளிப்படுத்தும் காட்சிகளை விட சரக்கடித்து போதையேறும், கூத்தாடும் காட்சிகள் அதிகம்.
எல்லாத்துக்கும் குவார்ட்டரும் குடியும் தானா?

குடிக்காத இளைஞர்களும் இந்தக் காட்சிகளின் சுவாரஸ்ய மோகத்திலேயே நாசமாகிப் போய்விடக்கூடிய அபாயம் உள்ளதைத் திறமையான அட்லீ போன்றவர்களாவது உணரக் கூடாதா?


September 12, 2013

வருத்தப்படாத வாலிபர் சங்கம்


பலநாள் பட்டினி கிடந்தவனுக்கு பந்திபோட்டு  எல்லாச் சுவையும் உள்ள,பலசுவையான ஆகாரங்களை வயிறு நிறையப் பரிமாறினால் எப்படி இருக்குமோ அப்படித்தான் 'வருத்தப்படாத வாலிபர் சங்கம்' எனக்கு..
அண்மைக்காலமாக  ஏற்படுத்திய கடுப்பைப் போக்க படம் முழுக்க  ரசிக்கக்கூடியதாக அமைந்த வ.வா.ச நீண்டகாலத்துக்குப் பிறகு ஒரு கொட்டாவியாவது இல்லாமல் பார்த்த படம்.

படம் முழுக்க சிரிப்புக்குக் குறைவில்லை. சிரிப்பு மட்டுமே தான் படமே.

சிவகார்த்திகேயனுக்கு என்றே வடிவமைத்த கதையில் வீடுகட்டி  சிவாவுடன் சேர்ந்தே கலக்கி சிக்சர்,பவுண்டரிகளை விளாசியுள்ள இன்னும் இருவர் சத்யராஜ் & 'பரோட்டா' சூரி.

இதே கதையைக் கொஞ்சமென்ன நிறையவே சீரியசாக முன்னைய காலகட்ட படங்களில் பார்த்திருப்போம்.

வேலை வெட்டியற்ற  ஒருத்தன்,கிராமத்துத் தலைவரின் மகளைக் கடுமையான எதிர்ப்புக்களின் மத்தியில் காதலித்து வெல்வது பற்றி பல படங்களில் பார்த்திருப்போம்.

ஆனால் பார்த்த  விதமான காட்சிகள் இல்லாமல், தேவையற்ற அலுப்பான, இழுவைகள் இல்லாமல், சண்டைக்காட்சிகளோ, ஆபாசமான காட்சிகளோ இல்லாமல், உப்புச் சப்பற்ற நகைச்சுவைகள் இல்லாமல், சும்மா சுவிட்சர்லாந்துக்கும் கனடாவுக்கும் போய்க் கனவில் பாடி ஆடாமல், ஒரு கோர்வையாக சுவையாக அங்கே இங்கே திசைதிரும்பாமல் கொடுத்திருப்பதில் வெற்றி கண்டிருக்கிறார் அறிமுக இயக்குனர் பொன் ராம்.

வ.வா.ச அமோக வாக்குகளை அள்ளிக்கொள்ள  முக்கியமானவர்கள் நின்று ஆடியிருக்கிறார்கள்.
சிவா, சத்யராஜ், சூரி தவிர,  புதுமுக நடிகை ஸ்ரீ திவ்யா மனதில் நிற்கிறார். இன்னும் பாடசாலை போகிற சிறுமி மாதிரியான ஒரு அப்பாவித்தோற்றம். அழகாக நடிக்கிறார்.

இயக்குனர் பொன் ராமும் வசனங்களால் வயிறு வலிக்க சிரிக்கவைத்திருக்கும் இயக்குனர் (இந்தப் படதுக்கல்ல) M.ராஜேஷும் தொடர்ந்து கூட்டணி அமைத்தால் நான்  வாக்குப்போடவும் தயாராக இருக்கிறேன்.
அதேபோல இசையமைப்பாளர் D.இமான். 
அண்மைக்காலத்தில் எல்லாப் பாடல்களையுமே ஜனரஞ்சகமாகக் கொடுத்துவருகிற  இசையமைப்பாளர் என்றால் இமான் மட்டும் தான்.
மைனா, கும்கி, மனம் கொத்திப் பறவை என்று அத்தனை பாடல்களும் ஹிட்டான படங்களின் இசையமைப்பாளர்.

இவர்களோடு ஒளிப்பதிவாளர் M.பாலசுப்ரமணியத்தையும் சேர்த்துக்கொள்ளலாம்.


முதல் காட்சிகளில் சத்யராஜ் வரும்போது சீரியசான பாடமாக இருக்குமோ, படம் முடியும்போது ஏதாவது 'படிப்பினை' சொல்லி பயமுறுத்தப்போறாங்களோ என்றெல்லாம் பயந்துகொண்டே பார்த்தால்....

கிடைக்கின்ற சின்ன,சின்ன இடங்களிலெல்லாம் சிறப்பாக செதுக்கி அலுப்பில்லாத நகைச்சுவைகளால் நிரப்பி குறையொன்றுமில்லாமல் கோர்த்திருக்கிறார்.

Timing comedy, இயற்கையாகவே சத்யராஜ், சிவகார்த்திகேயன், சூரி ஆகியோருடன் காட்சிகளுக்குக் காட்சி சிரிப்பை இயல்பாய் வரவழைப்பது இலகுவாகிவிடுகிறது இயக்குனருக்கு.
கமலின் படங்களில் வருகிற மாதிரி upper class நகைச்சுவைகளாக இல்லாமல், ஒரு செக்கன் தவறவிட்டாலும் ஏன்டாப்பா மற்ற எல்லாரும் சிரிக்கிறாங்க என்று விழிக்காமல் கிடைக்கிற நேரமெல்லாம் எல்லோரும் சிரிக்கக்கூடிய (லொஜிக் எல்லாம் பார்க்கத் தேவையில்லாத) படம்.


இயக்குனரின் பொங்கிவழியும் நகைச்சுவை உணர்வுக்கு ஒரு சிறு உதாரணம் - சிவாவுக்கு போட்டியாக சூரி போட்டிச் சங்கம் அமைக்கும் காட்சியில் சிவாவும் சூரியும் பேசுகின்ற பின்னணியில் ஒரு பெரிய விளம்பரப்பலகை.

அதிலே சங்கத் தலைவர் என்று சூரியின் பெயர் - கோடியும் பொருளாளர், செயலாளர் என்று நமீதா, TR , Power Star என்று கலாய்த்திருப்பார்கள்.
அதேபோல சத்யராஜின் துப்பாக்கி, அல்லக்கைகள் வரும் காட்சிகளில் இருக்கும் எள்ளல்களிலும், கிடைக்கிற சந்தர்ப்பங்களிலெல்லாம்  நட்சத்திரங்கள்,பிரபலங்களை எல்லாம் சாடை மாடையாகக் கலாய்த்துக் கலக்குவதும் செம ஜாலி.

 வசனகர்த்தா ராஜேஷ் படம் முழுக்கத் தன் முத்திரையைப் பதித்து நிற்கிறார்.
எந்த வசனத்தைக் குறித்து சொல்லலாம் என்று மண்டையைப் பிய்க்கிற அளவுக்கு எல்லா வசனங்களிலும் சிரிப்பு வெடிகள்.

திரையரங்கம் முழுவதும் முழுநேரமும் சிரிப்பலைகளால் அதிர்ந்துகொண்டேயிருக்கிறது.

சீரியசாகப் படம் திரும்புகிறது என்று நினைக்கிற நேரமெல்லாம் எங்கேயாவது இருந்து ஒரு குபீர் சிரிப்பைக் குமுறி விடுகிறார்கள்.

சிவாவின் காதலிக்குத் திருமணம்; ஊரெல்லாம் அழைப்புக் கொடுத்துக்கொண்டிருக்க, ஒரு சிறுமி வந்து "அக்கா கூப்பிடுறா" என்று சொல்ல, சிவா கேட்கிற "உங்க அக்கா நல்லா இருக்குமா?" என்ற இடம் ஒரு உதாரணம்.

படத்தின் இன்னொரு பாராட்டக் கூடிய விஷயம், சிரிக்கவைக்கிறேன் பேர்வழி என்று கோமாளிக் கூத்துக்களை அரங்கேற்றாமல் எடுத்துக்கொண்ட திரைக்கதை வழியாகவே படம் பயணித்திருப்பது.


வடிவேலு, விவேக் இருவரும் ஓய்ந்த பிறகு தனிக்காட்டு ராஜாவாக வலம் வந்துகொண்டிருக்கும் சந்தானத்துக்கு நல்லதொரு போட்டியாக வந்து சேர்ந்திருக்கிறார் சூரி. அவரது அலாதியான எடுத்தெறிந்த பேச்சும் அந்த முகமும் தனித்துவமானவை.

சிவகார்த்திகேயனுக்கு ஏறுமுகம் தான். கிடைக்கிற ஆடுகளமெல்லாம் அவரது கொடி பறக்கிறது.
தனுஷ் போலவே கிடைக்கும் பாத்திரமெல்லாம் அவருக்கென்றே வார்த்தது போல ஆகிவிடுகிறது; அவரும் அந்தந்தப் பாத்திரங்களாக மாறிவிடுகிறார்.


ஒரு வழக்கமான கிராமத்து மைனர் இளைஞன் போல தோற்றம்; ஆடைகள், அந்த எகத்தாளம் என்று காட்சிகளில் போஸ் பாண்டி வந்து நின்றால் கண்ணை அங்கே,இங்கே அகற்றமுடியவில்லை.

ஆனால், சத்யராஜ் வரும் காட்சிகளில் நாயகன் சத்யராஜ் தான். சீவாவும் கூட ஏனோ கொஞ்சம் அடங்கிப்போகிறார் போல ஒரு தோற்றம்.
சிரிக்கவைக்கிறார்; சீறுகிறார்; நெகிழ்கிறார்;மொத்தத்தில் கலக்குகிறார்.

நண்பனில் ஆரம்பித்த சத்யராஜின் குணச்சித்திரப் பயணம் (தலைவா உட்பட)அவருக்கு முன்பை விட அதிகம் ரசிகர்களைப்  பெற்றுத்தரும் என்பது நிச்சயம்.

சென்னை எக்ஸ்பிரஸ் கூட அவருக்கு  இந்திய வாய்ப்புக்களை வழங்கலாம்.
இனி கம்பீர, கலகலப்பு மாமா என்றால் இயக்குனர்களின் தெரிவு சத்யராஜ் தான்.

கதாநாயகி புதுமுகம் ஸ்ரீ திவ்யா நல்லதொரு கண்டுபிடிப்பு.


படத்தின் இடையிடையே வரும் சில சம்பவங்கள் போலவே, இமானின் இசையில் ரசிகர்களை ஈர்த்திருந்த பாடல்களும் இயல்பாக படவோட்டத்தொடே இணைந்து பயணிப்பது படத்தின் வேகத்தையோ, நகைச்சுவையோ குறைக்காமல் இருப்பது இயக்குனரின் வெற்றியே.
படத்தொகுப்பு செய்த விவேக் ஹர்ஷனுக்கும்  சொல்லலாம்.

பாடல்களின் வெற்றியென்று நான் கருதுவது, வருத்தப்படாத வாலிபர் சங்கம், கலரு,இந்தப் பொண்ணுங்களே பாடல்கள் வந்தபோதெல்லாம் படம் பார்த்துக்கொண்டிருந்த வாலிபவட்டங்களும் சேர்ந்தே பாடியது தான்.

இவையெல்லாம் இப்போது வானொலியில் சக்கைப்போடு போட்டுக்கொண்டிருக்கின்றன.
ஆனால் படம் பார்த்தது முதல் 'பார்க்காதே பார்க்காதே' மனதுக்குள் நிற்கிறது. ஏனோ ஒரு கிறக்கமும் மயக்கமும் மெட்டிலும் குரல்களிலும்.

அதுசரி, ஊதாக்கலரு ரிப்பன் பாட்டில் வரும் ரிப்பன் உண்மையாக ஊதா நிறம் தானா?
எனக்கென்னவோ இள நீலம் மாதிரியல்லவா தெரிந்தது.


ஒரு சிம்பிள் கதையை  அதற்கேற்ற பாத்திரங்களை சரியாகப் பொருத்தி, சிரிப்போ சிரிப்பாகப் படம் முழுக்கக் கொட்டி சிறப்பாகக் கொடுத்ததன் மூலம் அடுத்த படம் எப்போது என்று எதிர்பார்க்க வைத்திருக்கிறார் இயக்குனர் பொன் ராம்.


நண்பர் சிவா மீண்டும் ஜெயித்திருக்கிறார். விடா முயற்சி விஸ்வரூப வெற்றி என்பதில்  பெருமையாக இருக்கிறது. இன்னும் எதிர்பார்க்கிறோம்.


வருத்தப்படாத வாலிபர் சங்கம் -  வாழ்நாள் மெம்பர்ஷிப் வேண்டும் 

Related Posts Plugin for WordPress, Blogger...

ரசிக்க,சுவைக்க,சிரிக்க - கிளிக்குங்க..


View My Stats

Subscribe via email

Enter your email address:

Delivered by FeedBurner

Certified